Ֆրանքոֆոնի գագաթաժողովի ծիրին մէջ Ատրպէյճանի դէմ սադրանք կազմակերպուած է, որուն հեղինակը Ֆրանսան էր, յայտարարած է Ատրպէյճանի նախագահ Իլհամ Ալիեւը` ելոյթ ունենալով իր գլխաւորած «Ենի Ազէրպայճան» կուսակցութեան 30-ամեակին նուիրուած միջոցառման:
«Այդ սադրանքին հեղինակը Ֆրանսան էր, իսկ հիմա Ֆրանսան կը հովանաւորէ Հայաստանը: Անոնք միմեանց քոյրեր կ՛անուանեն, եւ այդ յատուկ կ՛ընդգծեն, չնայած կրպային նաեւ իրար եղբայրներ անուանել», հեգնած է Ալիեւը:
Ատրպէյճանի առաջնորդին խօսքերով` Ֆրանքոֆոնի գագաթաժողովը բանաձեւ փափաքած է ընդունիլ, որուն մէջ Ատրպէյճանի դէմ «իրականութեան չհամապատասխանող» ձեւակերպումներ կային:
«Բոլոր հակաատրպէյճանական թեզերը հեռացուած են մեր ընկերներու ջանքերուն շնորհիւ», ըսած է Ատրպէյճանի առաջնորդը` առանց յստակացնելու, թէ ինչ թեզերու մասին է խօսքը եւ որոնք են Պաքուին սատարած երկիրները:
Իլհամ Ալիեւը իր ծաւալուն ելոյթի ընթացքին անդրադարձած է նաեւ ՀԱՊԿ-ին, պնդած է, որ այդ կառոյցին մէջ Ատրպէյճանը աւելի շատ բարեկամ ունի, քան Հայաստանը: Ատրպէյճանի առաջնորդին խօսքերով` Երեւանը չէ յաջողած ռազմական այդ դաշինքը բացասաբար տրամադրել Պաքուի նկատմամբ, քանի որ կազմակերպութեան միւս անդամները չեն տրուած Երեւանի «սադրանքներուն»: