Հայաստանի Հակափտածութիւն Կոմիտէի եւ ԱՄՆ Հետաքննութիւններու Դաշնային Բիւրոյի միջեւ ստորագրուած է Համագործակցութեան յուշագիր:
Յուշագիրը հայկական կողմէ ստորագրած է Հայաստանի Հակափտածութիւն Կոմիտէի նախագահի տեղակալի պաշտօնակատար Մուշեղ Պապայեանը:
Ինչպէս Կոմիտէն կը փոխանցէ, յուշագրին համաձայն, երկու կառոյցները պիտի համագործակցին փտածութեան յանցագործութիւններու դէմ պայքարի ոլորտին մէջ, պիտի կազմակերպեն փոխանակման ծրագրեր, դասընթացքներ, աշխատանքային քննարկումներ:
Պապայեանը Ուաշինկթընի մէջ էր 12-17 Յունիսին` Հակափտածութիւն Կոմիտէի եւ ԱՄՆ գործընկեր կառոյցներուն միջեւ երկկողմ յարաբերութիւններու հաստատման եւ համագործակցութեան ընդլայնման նպատակով:
Ան հանդիպած է նաեւ ԱՄՆ Պետական Քարտուղարութեան Թմրամիջոցներու դէմ պայքարի եւ իրաւապահ համագործակցութեան բիւրոյի, Համաշխարհային հակափտածութեան համակարգող գրասենեակի եւ այլ կառոյցներու ներկայացուցիչներուն հետ: