Միացեալ Նահանգները կ’ողջունէ անցեալ շաբթուայ Պրիւքսէլի մէջ Հայաստանի վարչապետ Նիկոլ Փաշինեանի եւ Ատրպէյճանի նախագահ Իլհամ Ալիեւի բանակցութիւններէն յետոյ 10 հայ զինծառայողներու ազատ արձակումը։ Այս մասին Թուիթըրի իր էջով գրած է Պետական բաժանմունքի խօսնակ՝ Նէտ Փրայս։
«Մենք կոչ կ’ընենք ամբողջութեամբ եւ արագօրէն ազատ արձակելու մնացած բոլոր կալանաւորները», – աւելցուցած է Փրայս:
Ֆրանսայի նախագահ՝ Էմանուէլ Մաքրոն եւս ողջունած է Պրիւքսէլի մէջ Հայաստանի վարչապետ Նիկոլ Փաշինեանի եւ Ատրպէյճանի նախագահ Իլհամ Ալիեւի բանակցութիւններէն յետոյ 10 հայ զինուորներու ազատ արձակումը։
«Ազատ արձակուած են տասը հայ զինուորներ: Ես կ’ուզեմ ողջունել Եւրոպական միութեան վճռական գործողութիւնները, որոնց օգնութեամբ մենք կը շարունակենք առաջ տանիլ երկխօսութեան այս ճանապարհը, որ կը տանի դէպի խաղաղութիւն Ատրպէյճանի եւ Հայաստանի միջեւ: Մենք առաջ կը շարժինք», – Թուիթըրով գրած է Մաքրոն։