Ազգային ժողովի նախագահ՝ Ալեն Սիմոնեան լրագրողներու իրաւունքներու պաշտպանութեամբ զբաղող կազմակերպութիւններու ներկայացուցիչներուն հետ քննարկած է Յուլիսին խորհրդարանի տարածքի եւ շէնքին մէջ գործող անվտանգութեան կանոններու լրագրողներու տեղաշարժին վերաբերող նորմերը, որոնց համաձայն պահպանուող կառոյցի յատուկ վերահսկելի գօտիներուն ագիլուած է հաւատարմագրուած լրագրողներուն զբաղիլ մասնագիտական գործունէութեամբ: Խօսքը, ինչպէս յիշեցուցած է ԱԺ լրատուականը, պատգամաւորներուն եւ աշխատակազմի աշխատակիցներուն աշխատասենեակներ տանող միջանցքներուն մասին է:
Ի պատասխան այն հարցին, որ կանոնակարգումը լրագրողներու մասնագիտական գործունէութեան խոչընդոտ կրնայ հանդիսանալ՝ ԱԺ նախագահ՝ Ալեն Սիմոնեան նշած է, որ անոնց բնոյթը բացառապէս անվտանգութեան նորմերէն կը բխի: Ան աւելցուցած է, որ այս պահուն աշխատանքներ կը տարուին լրագրողներու գործունէութիւնը ԱԺ-ի մէջ աւելի բարենպաստ դարձնելու, որպէս օրինակ բերելով տեղեկատուական ցանկացած առիթի պարագային համապատասխան բանախօսներու ապահովումը:
ԱԺ-ի նախագահը տեղեկացուցած է, որ օրերս լրագրողներուն հետ հանդիպման ընթացքին յայտնած է իւրաքանչիւր ամիս ճեպազրոյց ունենալու յանձնառութեան մասին:
Յիշեցնենք, որ ըստ փոփոխութիւններուն` խորհրդարանէն ներս լրագրողներուն կը թոյլատրուի աշխատիլ միայն նիստերու դահլիճին դիմաց գտնուող սրահը, օթեակը եւ Ազգային ժողովի այգին: Իսկ պատգամաւորներու աշխատասենեակները հասնիլ լրագրողները չեն կրնար, եթէ չունին պատգամաւորի համաձայնութիւնը: