Եւրամիութիւնը պատրաստակամութիւն կը յայտնէ յառաջիկայ 5 տարիներուն մէկուկէս միլիառ Եւրոյէ աւելի գումար յատկացնել Հայաստանին՝ հինգ առանցքային ծրագիրներու, որոնց շարքին` Սիւնիքի մարզի զարգացման համար: Փաստաթուղթը ներկայացուած Յուլիս 2-ին Պրիւքսէլի մէջ առանձնացնելով այն նախաձեռնութիւնները, որոնք Եւրոպական Յանձնաժողովը մտադիր է իրականացնել մինչեւ 2025 թուականը Արեւելեան Գործընկերութեան անդամ երկիրներուն մէջ:
Հայաստանի մասով Եւրոպական Յանձնաժողովը կը ծրագրէ.
1. Աջակցիլ 30,000 մանր ու միջին պիզնեսներուն` կայուն, նորարար եւ մրցունակ տնտեսութեան համար,
2. Խթանել սոցիալ-տնտեսական զարգացումը եւ հաղորդակցութիւնը` աջակցելով Հիւսիս-հարաւ միջանցքին,
3. Ներդրումներ կատարել տեղեկատուական տեխնոլոգիաներու, գիտութեան ու տեխնիկայի ոլորտներէն ներս,
4. Ամրապնդել հարաւային շրջաններու դիմադրողականութիւնը,
5. Ներդրումներ կանաչ Երեւանի համար` ուժանիւթի արդիւնաւէտ օգտագործման եւ բնութեան աւելի քիչ վնաս հասցնող աւտօբուսներու գործարկման ուղղութեամբ:
Ուղենշային առաջին ծրագրով կը նախատեսուի 500 միլիոն Եւրոյի աջակցութիւն տրամադրել փոքր ու միջին պիզնէսի 30,000 ներկայացուցիչներուն: «Համաճարակէն յետոյ տնտեսութեան վերականգնումը Հայաստանի համար գերակայ առաջնահերթութիւն է», – ըսած է Եւրոպական Յանձնաժողովը, արձանագրելով` այս հարցով օգնելով հայաստանցի գործարարներուն` Եւրամիութիւնը կը նպաստէ նոր աշխատատեղերու ստեղծման, պիզնէսի զարգացման ու արդիականացման, երկարաժամկէտ կտրուածքով` Հայաստանի կայուն սոցիալ-տնտեսական վերականգմանը:
Այս առումով, ըստ փաստաթուղթի, առաջնահերթութիւնը տրուած է այն ձեռներէցներուն, որոնք կ՛աշխատին բնութիւնը պահպանող տեխնոլոգիաներով, յատկապէս շրջաններու մէջ, ինչպէս նաեւ այն պիզնէսներուն, որոնք ղեկավարները կանայք են:
Երկրորդ ծրագիրով կը նախատեսուի աջակցիլ Հայաստանի սոցիալ-տնտեսական զարգացման եւ հաղորդակցութեանը, ընդգծելով, որ Հայաստանի ազգային օրակարգի առաջնահերթութիւններէն է Հիւսիս-հարաւ միջանցքի շահագործումը, որը հնարաւորութիւն կու տայ ապահովել ելք դէպի միջազգային առեւտրային ուղիներ եւ շուկաներ:
«Տրանսպորտային ենթակառուցուածքներու բարելաւումը հնարաւորութիւն կու տայ սերտացնել կապը մարզերու միջեւ, ինչպէս նաեւ Հայաստանի կապը հարեւան երկրներու եւ Եւրամիութեան հետ»,- կ՛ըսէ Եւրոպական Յանձնաժողովը, աւելցնելով. «Այս ուղղութեամբ Եւրամիութեան ներդրումը կը կեդրոնանայ Հիւսիս-հարաւ մայրուղու տակաւին չկառուցուած հատուածներու, որոնց շարքին` Սիսիան-Քաջարան ճանապարհի վրայ»: Այս ծրագրի իրագործման համար կը նախատեսուի 600 միլիոն Եւրօ յատկացնել, որ կը տրամադրուի նաեւ հարաւի մէջ նախատեսուած նոր` Սիսիան-Քաջարան թունելի կառուցման:
Երրորդ ու չորրորդ ծրագիրները կը վերաբերին աջակցութիւն՝ նորարարութեան, գիտութեան, Հայաստանի հարաւային շրջաններու դիմադրողականութեան ամրապնդման պատերազմէն յետոյ ստացած հարուածներուն, պատերազմական գօտիէն տեղահանուածներու աշխատանքի ու կրթութեան կարիքներուն:
Վերջին` հինգերորդ ուղղութիւնը կր վերաբերի մայրաքաղաքին, մասնաւորապէս կանաչ Երեւանին: Այս նպատակով կը նախատեսուի աջակցիլ «կանաչ Հանրային փոխադրամիջոցներու ներմուծմանը, որոնք աւելի քիչ վնաս կը հասցնեն մայրաքաղաքի շրջակայ միջավայրին:
Փաստաթուղթը միաժամանակ կ՛ընդգծէ` երբ հնարաւորութիւն ստեղծուի, Եւրամիութիւնը պատրաստ է նաեւ աջակցիլ Հարաւային Կովկասի յետպատերազմեան վերականգնման եւ հակամարտութեան վերափոխման, անոնց շարքին` պատերազէն տուժած տարածքներու ականազերծման, սոցիալ-տնտեսական զարգացման, խաղաղութեան հաստատմանն ու հաշտեցման:
Հայաստանէն բացի, Եւրոպական Յանձնաժողովը նոյնանման ծրագրեր ունի նաեւ Արեւելեան Գործընկերութեան անդամ միւս երկիրներուն` Վրաստանի, Ատրպէյճանի, Մոլտովայի եւ Ուքրանիոյ համար: