«Հայոց Ցեղասպանութեան 106-րդ տարելիցը վերստին վկայեց, որ սեփական ցաւը զգում են բոլորը, սակայն խորն ու մարդկային է զգալ ու կիսել ուրիշի՛ ցաւը, աւելին` խիզախել եւ բարձրաձայնել այդ մասին», յայտարարած է նախագահ՝ Արմէն Սարգսեան իր շնորհակալական ուղերձով:
«Արդէն իսկ բազմաթիւ երկրների ղեկավարներ, կառավարութիւններ ու խորհրդարաններ, հասարակական, հոգեւոր, գիտական ու ակադեմիական շրջանակներ, միջազգային կառոյցներ էին հանդէս եկել 1915թ. Հայոց ցեղասպանութեան ճանաչման եւ դատապարտման կապակցութեամբ: Իմ Հայաստան երկրի, իմ ժողովրդի եւ անձամբ իմ անունից ցանկանում եմ եւս մէկ անգամ շնորհակալութեան ու երախտագիտութեան խօսքեր ուղղել նրանց բոլորին եւ մեզ սրտակից ժողովուրդների բոլոր զաւակներին»,- նշած է ՀՀ նախագահը` ուշադրութիւն դարձնելով նաեւ, որ Հայոց Ցեղասպանութեան միջազգային ճանաչումը ստացաւ ծանրակշիռ ու խիզախ ազդակ մը՝ ի դէմս ԱՄՆ-ի նախագահ՝ Ճօ Պայտընի Ապրիլ քսանչորսի յայտարարութեան:
«Ցաւը համախմբում է մեզ, բայց մենք պէտք է համախմբուենք նախ եւ առաջ յանուն յաջողութեան, ինչպէս նաեւ՝ յանուն մեր անվտանգութեան եւ շահերի: Համազգային միասնութիւնն ու փոխըմբռնումը, համերաշխութիւնն ու հանդուրժողականութիւնը յաջողութեան հասնելու լաւագոյն ճանապարհն են:
Հայոց Ցեղասպանութեան դատապարտման ու ճանաչման իւրաքանչիւր քայլ իւրատեսակ ազդանշան եւ զգուշացում է բոլոր նրանց, ովքեր դեռ ձգտում են յարաբերութիւնները կարգաւորել եւ նպատակներին հասնել բռնի ուժի եւ մարդու իրաւունքների ոտնահարման միջոցով: Երէկ դա Օսմանեան կայսրութիւնն էր, այսօր՝ նրա ժառանգ ժամանակակից Թուրքիան ու վերջինիս «փոքր եղբայր» Ատրպէյճանը: Իսկ ցեղասպանութիւնը վաղեմութեան ժամկէտ չունի…
Ես վստահ եմ, որ ազատ եւ անկախ ապրելու մեր ճանապարհը շարունակական է, որովհետեւ մենք կարո՛ղ ենք ու յաղթահարելո՛ւ ենք այդ ճանապարհի խոչընդոտներն ու մարտահրաւէրները, եւ դա անելու ենք նաեւ մեր բարեկամների աջակցութեամբ», – ըսուած է Սարգսեանի ուղերձով:
