Այս տարուայ Յունուար մէկի դրութեամբ՝ Հայաստանի մշտական բնակչութեան թիւը կազմած է 2 մլն 964.1 հազար։ Նախորդ տարուայ Յունուար 1-ի դրութեամբ այս տարուայ նոյն ժամանակահատուածին ՀՀ մշտական բնակչութեան թիւը աւելցած է 4․4 հազարով։
ՀՀ վիճակագրական կոմիտէն Փետրուար 5-ին հրապարակած է ցուցանիշներ, ըստ որու՝ մշտական բնակչութեան թիւը 2018-ին նուազած էր 7.4 հազարով, 2019-ին՝ 5.6 հազարով, իսկ 2020-ին աւելցած է 4․4 հազարով։
Հայաստանի քաղաքային բնակավայրերուն մէջ Յունուար մէկի դրութեամբ՝ կ’ապրի 1 միլիոն 896.2 հազար մարդ, իսկ գիւղական բնակավայրերը՝ 1 միլիոն 067.9 հազար մարդ։ Ներառեալ՝ Երեւան կը բնակի 1 միլիոն 092.0 հազար մարդ։
Հայաստանի մշտական բնակչութեան միջին տարիքը 2020 թուականի տարեսկզբի դրութեամբ կազմած է 36.9 (2019-ին՝ 36.7) տարի։ Կանայք աւելի երկար կեանքի տեւողութիւն ունին Հայաստանի մէջ, քան տղամարդիկ։ Տղամարդկանց համար միջին տարիքը 34.8 է, իսկ կանանց համար` 38.8։
Գաղթի մնացորդը դրական է
2020-ին Հայաստանի գաղթի մնացորդը դրական է՝ հաւանաբար պայմանաւորուած փակ սահմաններով։ Գաղթի մնացորդը 3.3 հազար կազմած է։ Համեմատութեան համար նշենք, որ 2019-ին գաղթի մնացորդը կազմած էր -15.4 հազար, իսկ 2018-ին՝ -18.2 հազար։
Մահերու թիւը աճած է, բնական յաւելաճը՝ նուազած
Ասոր զուգահեռ, 2020-ին երկրին մէջ էապէս նուազած է բնական յաւելաճը։ Եթէ 2018-ին բնական յաւելաճը կազմած էր 10.8 տոկոս, 2019-ին՝ 9.8 տոկոս, ապա 2020-ին այն կազմած է ընդամէնը 1․1 տոկոս։
2020-ին, ծնածներու թիւը կազմած է 36 448, իսկ մահացածներու թիւը՝ 35 371։ 2019-ի համեմատ 2020-ին մահերու թիւը Հայաստանի մէջ էապէս աճած է՝ 35.1 տոկոսով։ Նոյն ժամանակահատուածին ծնունդները աճած են ընդամէնը 1․1 տոկոսով։
2020-ի Յունուար-Դեկտեմբերին բնակչութեան կենսունակութեան գործակիցը` ծնածներու եւ մահացութեան դէպքերու յարաբերակցութիւնը, կազմած է 103.0%, 2019-ի նոյն ժամանակաշրջանի 137.6 %-ի համեմատ։
2020-ի Յունուար-Դեկտեմբերին գրանցուած 1 000 ամուսնութիւններու համեմատ արձանագրուած է ամուսնալուծութեան 259 դէպք` 2019-ի Յունուար-Դեկտեմբերին արձանագրուած 249-ի համեմատ։
