Հայաստանի վարչապետը խորհրդարանական եւ հետաքրքրուած արտախորհրդարանական ուժերուն հրաւիրեց խորհրդակցութիւններու՝ 2021-ին արտահերթ խորհրդարանական ընտրութիւններ անցկացնելու հարցով։ Այս մասին վարչապետը յայտարարեց Դիմատետրի (ֆէյսպուքի) իր էջով:
Սիրելի ժողովուրդ, սիրելի հայրենակիցներ.
Հիմա արդէն ակնյայտ է, որ վարչապետի հրաժարականի պահանջով ընդդիմադիր գործընթացը չարժանացաւ ժողովրդի աջակցութեանը։
Ընդդիմութիւնն իր պահանջի շուրջ ժողովրդական աջակցութիւն գեներացնելու բոլոր հնարաւորութիւններն ունեցել է. տիրապետում է ֆինանսական, լրատուական, կազմակերպչական ահռելի միջոցների, ունեցել է հանրահաւաքներ եւ բողոքի ակցիաներ կազմակերպելու լայն հնարաւորութիւններ, բայց ոչ միայն չի կարողացել իր պահանջների ժողովրդական աջակցութիւն ապահովել, այլեւ նրա աջակիցների թիւը հասել է նուազագոյնի, հրապարակի գործընթացը հասել է մարման։
Ու ոչ ոք չի կարող ասել, թէ մենք բիրտ ուժի կիրառմամբ պահել ենք իշխանութիւնը։ Ընդհակառակը՝ մեզ մեղադրում են անհարկի մեղմութեան մէջ։
Այս ամէնը, սակայն, որեւէ կերպ չի փոխում ժողովրդի առաջ կանգնելու եւ ժողովրդի առաջ պատասխան տալու մեր քաղաքական թիմի ու իմ անձնական յանձնառութիւնը։ Ես, կառչած չեմ վարչապետի աթոռից, բայց եւ՝ չեմ կարող անփոյթ վերաբերմունք ունենալ ժողովրդի կողմից ինձ յանձնուած իշխանութեան, վարչապետի պաշտօնի նկատմամբ։
Այդ պաշտօնի եւ երկրի յետագայ քաղաքական առաջնորդութեան ճակատագիրը պէտք է որոշի ժողովուրդը՝ իր կամքի ազատ արտայայտմամբ եւ ես, որպէս Հայաստանի վարչապետ, ինձ համարում եմ այդ կամքի ազատ արտայայտման երաշխաւորը։
Նաեւ պատրաստ եմ ժողովրդի որոշման արդիւնքում թողնել վարչապետի պաշտօնը։ Եւ վարչապետի պաշտօնը կարող եմ թողնել միայն ժողովրդի որոշմամբ։
Նաեւ պատրաստ եմ ժողովրդի վստահութեան վերահաստատման դէպքում յետագայում էլ շարունակել Հայաստանի Հանրապետութեան առաջնորդութիւնը՝ այս դժուարին ժամանակներում։
Այս բոլոր հարցադրումների պատասխանը ստանալու միայն մի տարբերակ կայ՝ արտահերթ խորհրդարանական ընտրութիւնների անցկացումը։
Ելնելով վերը նշուածից՝ խորհրդարանական եւ հետաքրքրուած արտախորհրդարանական ուժերին հրաւիրում եմ խորհրդակցութիւնների՝ 2021 թուականին արտահերթ խորհրդարանական ընտրութիւններ անցկացնելու հարցով։
