Երկուշաբթի երեկոյեան, Վարչապետ Նիկոլ Փաշինեան յայտարարեց, որ Ռուսաստանի եւ Ատրպէյճանի նախագահներուն հետ ղարաբաղեան պատերազմը ժամը 01.00-էն սկսեալ դադրեցնելու մասին յայտարարութիւն ստորագրած է:
Վարչապետը յայտնեց, որ յայտարարութեան բովանդակութիւնը, որ արդէն հրապարակուած է, խիստ ցաւոտ է անձամբ իր եւ ժողովուրդի համար:
«Սիրելի հայրենակիցներ, քոյրեր եւ եղբայրներ. անձամբ իմ եւ բոլորիս համար ծանր, չափազանց ծանր որոշում եմ կայացրել:
«Ռուսաստանի եւ Ատրպէյճանի նախագահներուն հետ ղարաբաղեան պատերազմը ժամը 01.00-ից դադարեցնելու մասին յայտարարութիւն եմ ստորագրել: «Յայտարարութեան տեքստը, որ արդէն հրապարակուել է, անասելի ցաւոտ է անձամբ ինձ եւ մեր ժողովրդի համար:
«Այդ որոշումը կայացրել եմ ռազմական իրադրութեան խորը վերլուծութեան եւ այդ իրադրութեանն ամենալաւը տիրապետող մարդկանց գնահատականի արդիւնքում: Նաեւ հիմնուելով այն համոզմունքի վրայ, որ ստեղծուած իրավիճակում սա ՀՆԱՐԱՒՈՐ ամենալաւ հանգուցալուծումն է: Այս ամէնի մասին առաջիկայ օրերին հանդէս կը գամ մանրամասն ուղերձով:
«Սա յաղթանակ չէ, բայց չկայ պարտութիւն, քանի դեռ ինքդ քեզ պարտուած չես ճանաչել: Մենք մեզ երբեք պարտուած չենք ճանաչի եւ սա պէտք է դառնայ մեր ազգային համախմբման, վերածննդի դարաշրջանի մեկնարկ:
«Մենք պէտք է վերլուծենք մեր անկախութեան տարիները, մեր ապագան պլանաւորելու եւ անցեալի սխալները չկրկնելու համար:
«Ծնկի եմ իջնում մեր բոլոր նահատակների առաջ: Խոնարհւում եմ մեր բոլոր այն զինուորների, սպաների, գեներալների, կամաւորների առաջ, ովքեր իրենց կեանքով են պաշտպանել ու պաշտպանում հայրենիքը: Նրանք իրենց անձնուրացութեամբ փրկել են արցախահայութեանը:
«Մենք պայքարեցինք մինչեւ վերջ: Եւ մենք յաղթելու ենք: Արցախը կանգուն է:
«Կեցց՛է Հայաստանը: Կեցց՛է Արցախը», – յայտարարեց վարչապետը: