Ստեփանակերտի մէջ առաւօտեան միացուած օդային տագնապի ազդանշանը դադրեցաւ գրեթէ մէկուկէս ժամ անց: Վնասներ կան քաղաքի տարբեր հատուածներու մէջ, գրեթէ հիմնայատակ քանդուած է տուներէն մէկը: Ներսը մարդիկ չեն եղած, սակայն հարեւանութեամբ գտնուողները տարբեր աստիճանի վնասուածքներ ստացած են:
«Ինքնաթիռ ա եղել, էստեղ մեծ տուն ա եղել` պեթոնով սարքած, պինդ տուն է եղել, սաղ փլուել ա…
Բայց կապ չունի, մին ա` չենք վախում 100 տոկոս: Մեր մէջ ուժ կայ, ինչ որ ուժ ա տուալ Աստուած, եւ պիտի յաղթենք, ուրիշ բան չկայ»,- կը պատմեն տեղացիները:
Ատրպէյճանական կողմը Ստեփանակերտին հարուածներ հասցուցած էր «Սմերչ»-ի հրթիռներով, կը յայտնեն Արցախի արտակարգ իրավիճակներու պետական ծառայութենէն: Արցախի մայրաքաղաքը հրթիռակոծուած է նաեւ կէսօրին:
Այսօր՝ Հոկտեմբեր 29-ին, օդային տագնապ միացած էր նաեւ Արցախի միւս բնակավայրերու մէջ` Ասկերան, Մարտունի եւ Մարտակերտ: Այդ քաղաքներուն վրայ Ատրպէյճանի զինուած ուժերը ռազմական օդուժ կիրառած են եւ ոչ առաջին անգամ: Ըստ Արտակարգ իրավիճակներու պետական ծառայութեան` բնակավայրերուն մէջ աւերներ կան: Խաղաղ բնակիչ տուժող չկայ։
«Ատրպէյճանը շարունակաբար ոտնահարում է միջազգային բոլոր համաձայնագիրները եւ խաղաղ բնակչութեան ու Արցախի բնակավայրերի վրայ կիրառում է անթոյլատրելի զինատեսակներ», – այս մասին յայտարարած է Արցախի արտակարգ իրավիճակներու գերատեսչութիւնը:
Այսօր հրթիռակոծուած է նաեւ Շուշին, կան տուժողներ: Ղազանչեցոց եկեղեցւոյ մօտ բազմաբնակարան շէնքը լրջօրէն վնասուած է:
