ԹԱՍՍ լրատուական գործակալութիւնը, յղում ընելով NTV թրքական հեռատեսիլային կայանին, կը հաղորդէ, որ նախագահ՝ Ռէճէպ Թայէպ Էրտողան ռուսաստանցի պաշտօնակից Վլատիմիր Փութինի հետ երէկուայ հեռախօսազրոյցի ընթացքին առաջարկած է համագործակցիլ ղարաբաղեան հակամարտութիւնը կարգաւորելու հարցով:
Այդ մասին Էրտողան ըսած է՝ այսօր՝ Հոկտեմբեր 28-ին ելոյթ ունենալով Թուրքիոյ խորհրդարանի՝ Ազգային մեծ ժողովի նիստին, զոր ուղիղ եթերով հեռարձակած է NTV-ն:
«Մենք լաւ բանակցութիւններ կատարեցինք Փութինի հետ: Մանրամասնօրէն քննարկեցինք Ղարաբաղի խնդիրը: Մենք ըսինք. – «Եկէք աւարտենք այս ամէնը Կովկասի մէջ, կ’ուզէք՝ համատեղ քայլեր ընենք, խօսինք կողմերուն հետ»: Հիմա կարեւոր է յստակ որոշել՝ պիտի լուծ՞ենք այս խնդիրը, թէ՞ ոչ», – յայտարարած է Էրտողան խորհրդարանէն ներս:
Հեռախօսազրոյցի ընթացքին Ռուսաստանի եւ Թուրքիոյ նախագահներ՝ Վլատիմիր Փութինը եւ Թայէպ Էրտողան չեն քննարկած թրքական կողմի մասնակցութեան հարցը Լեռնային Ղարաբաղի հակամարտութեան կարգաւորման գործընթացով: Այս մասին յայտարարած է Ռուսաստանի առաջնորդի մամլոյ քարտուղար՝ Տմիթրի Փեսքով, կը հաղորդէ «Կազեթա»-ն:
«Այդ օրակարգի վրայ չէ եղած»,- ըսած է Փեսքով:
Պետութիւններու ղեկավարներու հեռախօսազրոյցը տեղի ունեցած է Հոկտեմբեր 27-ին:
Փեսքով յիշեցուցած է, որ աւելի վաղ պարզաբանած է դիրքորոշումը Անգարայի` բանակցային գործընթացին մէջ ներգրաւման խնդրին վերաբերեալ: Ան նշած է, որ նոր տարրեր չեն յայտնուած, իսկ մարտերը ղարաբաղեան տարածաշրջանին մէջ դեռ կը շարունակուին եւ ափսոսանք ու անհանգստութիւն կ’առաջացնեն: