Ազգային ժողովի նախագահ՝ Արարատ Միրզոյեան Սեպտեմբեր 8-ին ընդունած է Ամենայն Հայոց կաթողիկոս՝ Գարեգին երկրորդը:
Շնորհակալութիւն յայտնելով հանդիպման հրաւէրը ընդունելու համար, Ազգային Ժողովի նախագահը նշած է, որ եկեղեցի-պետութիւն եւ եկեղեցի-կրթական համակարգ յարաբերութիւններուն վերաբերող շարք մը հասարակական հնչեղութիւն ունեցող հարցեր այժմ կը քննարկուին, եւ աւելցուցած, որ Հայ Առաքելական սուրբ եկեղեցին դարերու ընթացքին եղած է հայ ազգի յենասիւներէն մէկը ու 21-րդ դարուն ալ կը շարունակէ սերտ համագործակցութիւնը պետութեան հետ, յանուն հայ ժողովուրդի բարօրութեան, ըսուած է ԱԺ հասարակութեան հետ կապերու եւ հաղորդակցութեան վարչութեան հաղորդագրութեան մէջ:
Վեհափառը նշած է, որ բազում հարցեր ծառացած են ժողովուրդի եւ պետութեան առջեւ, եւ այդ մարտահրաւէրները դիմակայելու հարցով մեծապէս կարեւոր է Ազգային ժողովի օրէնսդրական առաքելութիւնը: Ան աւելցուցած է, որ Հայ Առաքելական եկեղեցին անկախութենէն ի վեր սերտօրէն գործակցած է Ազգային ժողովին հետ, եւ այդ գործակցութիւնը նաեւ իր դրական արդիւնքը ունեցած է եկեղեցի-պետութիւն յարաբերութիւնները կարգաւորող օրէնսդրութեան մշակման գործով:
ԱԺ-ի նախագահն ու Վեհափառը անդրադարձած են միջազգային համաձայնագրերու եւ կրթական չափորոշիչներու վերաբերող հարցերուն: Վեհափառը վերահաստատած է, որ Հայ Առաքելական եկեղեցին պիտի շարունակէ ջանքերը հայրենիքի զօրացման, պետութեան ամրացման եւ ժողովուրդի երջանիկ, խաղաղ եւ ապահով կեանքի կերտման համար: