Անցնող հինգ օրերուն, Տաւուշի շրջանի ուղղութեամբ ատրպէյճանական զօրքերուն կողմէ շարունակուող սադրիչ գործողութիւնները եւ շրջանի խաղաղ բնակավայրերուն ռմբակոծումը կու գան անգամ մը եւս ապացուցելու, որ Ատրպէյճանի բռնապետական ռեժիմը չի դադրիր արցախեան հակամարտութիւնը զէնքի ուժով լուծելու իր խիստ դատապարտելի մտադրութենէն եւ կը շարունակէ մնալ հարցին խաղաղ լուծման գլխաւոր խոչընդոտը: Դատապարտելի կը գտնենք նաեւ Թուրքիոյ բացայայտ կողմնակալ կեցուածքը ներկայ իրավիճակին առնչութեամբ, որ միայն կրնայ նպաստել տարածաշրջանին ա՛լ աւելի ապակայունացման:
Վերջին իրադարձութիւնները եկան վերահաստատելու այն փաստը, որ հայոց քաջարի ու մարտունակ բանակը պատրաստ է ոչ միայն պաշտպանելու հայրենի սահմանները, այլեւ ի պահանջել հարկին ճշգրիտ գործողութիւններով բարելաւել իր մարտական դիրքերը: Կը յուսանք, որ ռազմական գերակայութեան պատրանքներով լի հակառակորդը, որ տարիներ շարունակ ռազմատենչ կոչերով ու պատերազմի սպառնալիքով ասպարէզ կը կարդար Հայաստանի եւ Արցախի, վերջին զարգացումներու լոյսին տակ ճիշդ հետեւութիւններ ընէ եւ վերադառնայ բանակցային սեղան:
Այս օրերուն, աւելի քան երբեք, կը կարեւորենք համախմբուածութեան եւ միասնականութեան անհրաժեշտութիւնը՝ դիմադրելու համար ոչ միայն երեւցող, այլեւ աներեւոյթ թշնամիին, որ տակաւին կը շարունակէ մեծագոյն վտանգը ներկայացնել հայրենիքի բարօրութեան ու ապագային: Առ այդ, կրկին կոչ կ’ուղղենք մեր հայաստանաբնակ եւ արցախաբնակ հայրենակիցներուն՝ հետեւելու «Քորոնա» համաճարակին դէմ կանխարգելիչ կանոններուն, յանուն «Հզօր սահման, հզօր թիկունք» սկզբունքի:
Կեցցէ՛ հայոց բանակը:
Բի՜ւր յարգանք զոհուած մարտիկներու յիշատակին:
Ս.Դ.Հ.Կ. Կեդրոնական Վարչութիւն
Յուլիս 17, 2020