Home ՀԱՅԱՍՏԱՆ ԱԱԾ-ն Մանրամասնութիւններ Ներկայացուցած Է Ծառուկեանի Գործով

ԱԱԾ-ն Մանրամասնութիւններ Ներկայացուցած Է Ծառուկեանի Գործով

by MassisPost

«Բարգաւաճ Հայաստան» կուսակցութեան (ԲՀԿ) առաջնորդ եւ խորհրդարանական խմբակցութեան ղեկավար Գագիկ Ծառուկեանին մեղսագրուող յանցագործութեան հիմնաւոր կասկածը հաստատուած համարելու համար նախաքննական մարմինը, Ազգային անվտանգութեան ծառայութիւնը (ԱԱԾ), «դատարանում ներկայացրել է ոչ թէ մէկ վերաբերելի փաստեր կամ տեղեկատուութիւն, այլ՝ այդպիսի փաստերի կամ տեղեկատուութեան համակցութիւն, որոնք հնարաւորութիւն են տուել դատարանին հիմնաւորուած համարելու, որ մեղադրեալը առնչուում է կատարուած դէպքին, քրէական գործի մեղադրանքին, փաստական հանգամանքներին, մեղսագրուող յանցագործութեանը»: Այս մասին ըսուած է այն հաղորդագրութեան մէջ, որ ԱԱԾ մամուլի կեդրոնը տարածած է Յունիս 22-ին, «կարեւորելով հասարակական մեծ հնչեղութիւն ունեցող քրէական գործերով հանրութեանը թոյլատրելի չափով տեղեկատուութիւն տրամադրելու գործելաոճը եւ նպատակ ունենալով հանրութեան շրջանում սոյն քրէական գործի ելքով շահագրգիռ կամ ինքնուրոյն շահ հետապնդող շրջանակների կողմից ապատեղեկատուութեան տարածումը կանխարգելել»:

«Մասնաւորապէս, որպէս այդպիսի փաստական տուեալներ, դատարանը վկայակոչել եւ դիտարկել է գործով ներգրաւուած 5 կասկածեալների ցուցմունքները, ինչպէս նաեւ «Երեւանշին» ՍՊ ընկերութիւնում կատարուած խուզարկութեամբ յայտնաբերուած եւ առգրաւուած «ՀՀ Ազգային Ժողովի ԲՀԿ պատգամաւորների ընտրութիւնների 2017 թուականին ներկայացուած ընտրողների թիւ եւ վճարուած գումարները» վերտառութեամբ հաշուետուութիւնները, որոնցում առկայ են եղել յստակ նշումներ մէկ ձայնի համար վճարուած գումարների, ընդհանուր քուէների դիմաց ընտրողներին տուած կաշառքի չափի, աքթիւիսթներին վճարուած գումարների, Գագիկ Ծառուկեանի յանձնարարութեամբ այլ անձանց գումարներ փոխանցելու վերաբերեալ նշումներ, որոնք անկողմնակալ դիտորդի մօտ չեն կարող տարատեսակ մեկնաբանութիւնների տեղիք տալ, ինչը հաստատուել է նաեւ դատարանի կողմից:

Միեւնոյն ժամանակ դատարանը գտել է, որ քրէական գործով վարոյթի ընթացքում Գագիկ Ծառուկեանի ոչ պատշաճ վարքագիծը կանխել հնարաւոր է ազատութիւնից զրկելու հետ չկապուած այլ խափանման միջոցի կիրառմամբ», – նշուած է հաղորդագրութեան մէջ:

Ազգային Անվտանգութեան Ծառայութիւնը ուշագրաւ կը համարէ «յատկապէս այն, որ սոյն քրէական գործի յարուցման սկզբնական փուլում կատարուել են շուրջ 80-ից աւելի խուզարկութիւններ, որոնց ընթացքում «Բարգաւաճ Հայաստան» կուսակցութեան անդամների կամ աքթիւիսթների բնակարաններում յայտնաբերուել եւ առգրաւուել են նաեւ 2017 թուականի ապրիլ 2-ին ՀՀ Ազգային Ժողովի ընտրութիւնների ընթացքում «Ծառուկեան» կուսակցութիւնների դաշինքի եւ դրա կողմից առաջադրուած թեկնածուի օգտին քուէարկելու համար ընտրողներին կաշառքի առարկայ գումարները հասցէական կարգով տալու հանգամանքն ուղղակիօրէն հաստատող այլ փաստեր, որոնցում արդէն առկայ են եղել ընտրողների անհատական տուեալներ, ընտանիքի անդամների թիւը, իւրաքանչիւր անձին տրուած համապատասխան 10.000 ՀՀ դրամ գումարի վերաբերեալ նշումներ եւ կաշառք ստանալու հանգամանքը հաւաստող ստորագրութիւններ»:

Նախաքննական մարմնի տրամադրութեան տակ ներկայումս առկայ են նաեւ այնպիսի նիւթեր, որոնց ուսումնասիրութեամբ տեսանելի է, որ կուսակցութեան ղեկավար կազմի կողմից ըստ ծառայութեան վայրերի, զօրանոցների տեղակայման վայրերի, ծառայութեան ժամկէտների վեր են հանուել նաեւ յստակ զինծառայողների անհատական տուեալները, նախապէս կազմուել են կաշառք ստանալու պատրաստակամութիւն յայտնած անձանց ցուցակներ, դրանք համադրուել եւ ստուգուել են ինչպէս ընտրութիւնների նախորդող ժամանակահատուածում, այնպէս էլ՝ ընտրութիւններց յետոյ, ՀՀ-ում գործող առեւտրային դրամատներից ընտրութիւնների նախորդող ժամանակահատուածում ստացել են 10.000 ՀՀ դրամներից բաղկացած հարիւրաւոր միլիոն դրամներ եւ նոյնաբնոյթ բազմաթիւ այլ փաստական տուեալներ, որոնց կապակցութեամբ նոյնպէս իրականացուում են աշխոյժ քննչական գործողութիւններ», – ըսուած է հաղորդագրութեան մէջ:

«Հաշուի առնելով կատարուած յանցագործութեան ամբողջական պատկերը բացայայտելու հանրային շահը»՝ ԱԱԾ-ն «ակնկալում է ստանալ նաեւ հանրութեան աջակցութիւնը եւ յորդորում է ՀՀ քաղաքացիներին սոյն դէպքի վերաբերեալ որեւէ տեղեկութիւններ տիրապետելու դէպքում անմիջապէս իրազեկել վարոյթն իրականացնող մարմնին»:

Յունիս 16-ին, Ազգային ժողովի համաձայնութիւնը ստանալէ յետոյ, Ազգային Անվտանգութեան Ծառայութիւնը միջնորդութիւն ներկայացուցած էր Երեւանի ընդհանուր իրաւասութեան դատարան, Ծառուկեանի նկատմամբ կալանաւորումը որպէս խափանման միջոց կիրառելու վերաբերեալ, ինչ որ դատարանի կողմէն մերժուած է:

Դատախազութիւնը ընդհանուր իրաւասութեան դատարանի որոշումը պիտի բողոքարկէ Վերաքննիչ քրէական դատարան։

Հարակից Նյութեր

Leave a Comment