Home ԳԼԽԱՒՈՐ ԼՈՒՐԵՐ «Վերջին Երկու Տարիներուն Հայաստանը Ժողովրդավարացման Առումով Լուրջ Յառաջընթաց Արձանագրած Է». Զեկոյց

«Վերջին Երկու Տարիներուն Հայաստանը Ժողովրդավարացման Առումով Լուրջ Յառաջընթաց Արձանագրած Է». Զեկոյց

by MassisPost

«Լուրջ յառաջընթաց նախեւառաջ քորուփցիայի դէմ պայքարի եւ ընտրութիւններու ոլորտներէն ներս». – այսպէս կը գնահատեն արեւմտեան ամենահեղինակաւոր իրաւապաշտպան կառոյցներէն մէկուն՝ Ուաշինկթոնի Freedom House-ի փորձագէտները Հայաստանի իշխանութիւններու յետյեղափոխական ձեռքբերումները, Մայիս 6-ին հրապարակուած ամենամեայ զեկոյցին մէջ, որ նուիրուած է անցումային շրջանի մէջ գտնուող արեւելաեւրոպական եւ յետխորհրդային 29 երկիրներու մէջ տիրող կացութեան:

Ըստ Զեկոյցի հեղինակներուն՝ Հայաստանը, 2018-էն 2020 թուականներուն դիտարկուող երեք տասնեակ պետութիւններու մէջ, ժողովրդավարացման ընթացքի առումով ամենամեծ յառաջընթացը արձանագրած է:
«Այս տարի, Հայաստանը զեկոյցի հրապարակման պատմութեան ընթացքին ամենաբարձր ցուցանիշը գրանցած է», – կը նշեն Freedom House-ի փորձագէտները՝ աւելցնելով, սակայն, որ երկրին մէջ դեռ մտահոգիչ հիմնախնդիրներ եւս առկայ են, ակնարկելով դատական ոլորտի շուրջ ծաւալուող զարգացումներուն:

Ըստ զեկոյցին, այսօր յետխորհրդային տարածքին մէջ, երկու պետութիւն կայ, ուր անցումը կառավարման ժողովրդավարական համակարգին գրեթէ նոյնատիպ խնդիրներու հետ բախում ունի, Հայաստանը եւ Ուքրանիան:
«Հայաստանի վարչապետ Նիկոլ Փաշինեան եւ Ուքրանիայի նախագահ Վլատիմիր Զելենսքին բախում ունին վստահութեան ամրապնդման, իրենց հետ կապուած յոյսերը արդարացնելու, [կառավարման] քորումփացուած համակարգերը առանց ժողովրդավարական նորմերու ոտնահարման վերակառուցելու դժուարին մարտահրաւէրներուն հետ», – կը նշեն ամերիկացի փորձագէտները:

Անդրադառնալով Նիկոլ Փաշինեանի իշխանութեան առջեւ ծառացած առաւել տեղային բնոյթի խնդիրներուն՝ Freedom House-ի մասնագէտները յատկապէս կանգ կ՛առնեն Ամուլսարի ոսկիի հանքի շահագործման շուրջ ծաւալուած վէճին վրայ: Ամուլսարի ճակատագիրը, ըստ զեկոյցի հեղինակներուն, «Հայաստանի վարչապետի համար գլխացաւ դարձած է»:

«Փաշինեանը այս խնդիրը ժառանգած է նախորդ քորումփացուած վարչակազմէն: Աքթիվիսթները ամիսներ շարունակ արգելափակուած կը պահեն հանքավայր տանող ճանապարհները: Ըստ անոնց՝ եթէ Փաշինեանը հաւանութիւն տայ այս ծրագրի իրագործման, ապա կ՛ապացուցէ, որ չի տարբերիր այն ղեկավարներէն, որոնց ինք հեռացուցած է իշխանութենէն», – ըսուած է զեկոյցով:

Զեկոյցի հեղինակները նաեւ յստակ խորհուրդներ կ’ուղղեն արեւմտեան կառավարութիւններուն, ըստ իրենց համոզումին.-

«Ժողովրդավարութեան զարգացումը եւ մարդու իրաւունքները երկկողմանի յարաբերութիւններու առաջնահերթութիւնը պէտք է դառնան: Յատուկ ուշադրութիւն պէտք է դարձուի այն պետութիւններուն, որոնց կառավարման համակարգը լուրջ փոփոխութեան փուլի մէջ է, մասնաւորաբար Հայաստանին եւ Ուքրանիային», – կը նշէ զեկոյցը:

«Հայաստանի մէջ հարկաւոր է լուրջ ներդրումներ կատարել օրէնքի գերակայութեան ու անկախ հաստատութիւններուն աջակցութիւն ապահովելու նպատակով: Խօսքը մասնաւորաբար դատական համակարգի եւ ոստիկանութեան համապարփակ բարեփոխումներու մասին է», – կը նշեն Freedom House-ի փորձագէտները՝ աւելցնելով, թէ. – «2018 թուականին Հայաստանի մէջ տեղի ունեցած թաւշեայ յեղափոխութեան հիմքը քաղաքական փոփոխութիւններու, օրէնքի գերակայութեան եւ համակարգային քոռրուփցիան արմատախիլ ընելու շուրջ համազգային համաձայնութեան առկայութիւնն էր»:

«Այս պատմական հնարաւորութիւն կը ստեղծէ ժողովրդավարութեան աջակիցներուն համար թէ՛ երկրէն ներս եւ թէ՛ անոր սահմաններէն դուրս: Թէ՛ Միացեալ Նահանգները եւ թէ՛ Եւրոպական Միութիւնը մեծցուցած են [Հայաստանին ցուցաբերուող աջակցութիւնը], բայց անոնց ծրագիրները պէտք է միտուած ըլլան նախեւառաջ ընկերային համերաշխութեան ամրապնդման ու քաղաքական բեւեռացուածութեան յաղթահարման: Այս մարտահրաւէրներու յաղթահարումը կրնայ առանցքային նշանակութիւն ունենալ միւս բոլոր ոլորտներուն մէջ կատարուած բարեփոխութիւններու յաջողութեան համար», – համոզուած են Freedom House-ի ամենամեայ զեկոյցի հեղինակները:

Հարակից Նյութեր

Leave a Comment