Արցախի Հանրապետութեան Կեդրոնական ընտրական յանձնաժողովի (ԿԸՅ) նախագահ Սրբուհի Արզումանեանի մեկնաբանութիւնը Ատրպէյճանի կեդրոնական ընտրական յանձնաժողովի յայտարարութեան կապակցութեամբ.-
«Ատրպէյճանի յայտարարութիւնն ուղղակի զաւեշտալի է։ Ընդամէնը մի քանի տարի առաջ Ատրպէյճանի իշխանութիւնները պնդում էին, որ Արցախում քաղաքացիական բնակչութիւն չկայ եւ փորձում էին ոչնչացնել Արցախի Հանրապետութեան խաղաղ բնակչութեանը՝ լայնածաւալ յարձակման ենթարկելով երկրի բնակավայրերը։ Մինչդեռ այսօր նրանք լկտիաբար յայտարարում են, որ Արցախի քաղաքացիները կարող են մասնակցել Ատրպէյճանում կայանալիք ընտրութիւններին։
Կը ցանկանայի ընդգծել, որ Արցախի Հանրապետութեան քաղաքացիների եւ Ատրպէյճանի Հանրապետութիւն պետութեան միջեւ որեւէ իրաւաքաղաքական կապ չկայ։ Արցախի ժողովուրդը դեռեւս 1991 թ. Դեկտեմբերի 10-ին կայացած հանրաքուէով ձայների բացարձակ մեծամասնութեամբ կողմ է արտայայտուել անկախ պետականութեան ստեղծմանը։
Արդէն 29 տարի է, ինչ Արցախի Հանրապետութեան քաղաքացիները արդիւնաւէտօրէն իրացնում են ազատ եւ թափանցիկ կամարտայայտման միջոցով սեփական պետական կառոյցներ ձեւաւորելու իրենց անքակտելի իրաւունքը։ Մարտի 31-ին Արցախում կայանալիք հերթական համապետական ընտրութիւնները եւս մէկ քայլ կը դառնան մեր երկրում ժողովրդավարական պետականութեան շարունակական ամրապնդման ճանապարհին։
Միեւնոյն ժամանակ կը ցանկանայի նշել, որ ոչ կառավարական կազմակերպութիւններ ներկայացնող Արցախի Հանրապետութեան քաղաքացիները Ատրպէյճանում կայանալիք ընտրութիւններին կարող են մասնակցել միայն որպէս միջազգային դիտորդներ, այն էլ՝ սեփական անվտանգութեան որոշակի երաշխիքների ապահովման պարագայում։ Արցախի Հանրապետութեան Կեդրոնական ընտրական յանձնաժողովի անդամներն իրենց հերթին կարող են դասընթացներ կազմակերպել եւ ատրպէյճանցի գործընկերների հետ կիսուել արդար ու թափանցիկ ընտրութիւնների անցկացման իրենց փորձով։ Միայն այս ձեւաչափով են կարող Արցախի Հանրապետութեան քաղաքացիները մասնակցել Ատրպէյճանում կայանալիք ընտրութիւններին»։
