Համահայկական խաղերու Պոլսոյ կարգադիր յանձնախումբի մամուլի ասուլիսին ժամանակ՝ յանձնախումբի ատենապետ Հայկարամ Քարասուն յայտարարած է, որ Պոլսոյ մարզիկներու խումբը պիտի չմասնակցի Արցախի մէջ կայանալիք Համահայկական խաղերուն: Այս մասին կը տեղեկացնէ Պոլսոյ հայկական «Ժամանակ» օրաթերթը:
Հայկարամ Քարասուն յայտնած է, որ չմասնակցելու գլխաւոր պատճառը խաղերուն Արցախի մէջ իրականացուելու հանգամանքն է, որ բարդ իրավիճակի մէջ դրած է պոլսահայ մարզիկներուն խումբը: Լաւատեղեակ ըլլալով տարածաշրջանային հարցերու մէջ՝ յատկապէս Արցախի խնդրի շուրջ Թուրքիոյ դիրքորոշման՝ յանձնախումբը չէ ցանկացած խնդիրներ ստեղծել մարզիկներուն համար: Իսկ մինչ այդ անոնք առանց խոչընդոտի մասնակցութիւն ունեցած են Հայաստանի մէջ իրականացուած համահայկական ծրագրերուն:
Քարասուն նաեւ նշած է, որ եթէ իրենց խումբը մասնակցէր խաղերուն՝ մարզիկները հայ համայնքը պիտի ներկայացնէին ինը մարզաձեւերու մէջ:
Հայաստանի Հանրապետութիւն-Արցախ-Սփիւռք եռամիասնութեան խորհուրդով Համահայկական 7-րդ ամառային խաղերը պիտի ընթանան Օգոստոս 5-17- ը: Բացման արարողութիւնը տեղի պիտի ունենայ Օգոստոսի 6- ին՝ Ստեփանակերտի գլխաւոր մարզադաշտին մէջ, փակումը պիտի կայանայ Օգոստոս 17- ին՝ Երեւանի Ազատութեան հրապարակին մէջ: Խաղերու կարգախօսն է՝ «Միասնութիւն՝ սփորթով»:
