Պաշտօնական Ուաշինկթընը կոշտ քայլերու կը դիմէ՝ փորձելով ստիպել Անգարային հրաժարիլ ռուսական արտադրութեան S-400 զենիթահրթիռային համակարգերու ձեռքբերումէն:
«Reuters» գործակալութեան տեղեկութիւններով՝ Միացեալ Նահանգներու պաշտպանութեան նախարարութիւնը դադրեցուցած է ամերիկեան նորագոյն F-35 ռազմական օդանաւերու՝ Թուրքիոյ մատակարարման գործընթացի շրջանակէն ներս յարակից սարքավորումներու առաքումը:
Գործակալութեան տեղեկութիւններով՝ խօսքը շարք մը կարեւոր համակարգերու մասին է, որոնց բացակայութիւնը F-35 օդանաւերու սպասարկումը Թուրքիոյ կողմէ գործնականօրէն անհնար կը դարձնէ:
Խնդրին քաջածանօթ անանուն շարք մը աղբիւրներ «Reuters»-ին փոխանցած են, որ խօսքը օդաչուներու վարժանքներուն համար նախատեսուած, այսպէս կոչուած, յատուկ նմանակներու մասին է, որոնց օգնութեամբ թուրք օդաչուները պէտք է սորվին կառավարել F-35-ները:
Նորագոյն արհեստագիտութիւններու հիման վրայ ստեղծուած առաջին երկու F-35 օդանաւերը Թուրքիոյ յանձնելու որոշումը կայացած էր դեռ նախորդ տարուան Յունիսին: Այդ օդանաւերը, սակայն, այժմ կը գտնուին ԱՄՆ Արիզոնա նահանգին մէջ, ուր անոնցմով վարժանքներ կ’իրականացնեն թուրք օդաչուները:
Այս պահուն, փաստօրէն, թրքական բանակը դեռ ի վիճակի չէ ինքնուրոյնաբար շահագործել կամ տնօրինել այդ օդանաւերը:
Փենթակոնի տեղեկութիւններով՝ օդանաւերը Թուրքիա պէտք է առաքուին Նոյեմբեր ամսէն ոչ շուտ: