Մարտի 1-ի զոհերու հարազատները յայտարարութիւն տարածած են, որ կը ներկայացնենք ստորեւ․
«Մարտի 1-ին երթ անցկացնելու վարչապետ Նիկոլ Փաշինեանի կոչը մեզ` մարտի 1-ի զոհերի հարազատներիս, յոյս է տալիս, որ վերջապէս, մարտիմէկեան ոճրագործութիւնից 11 տարի անց կատարւում են յստակ քայլեր այդ յանցագործութեան բացայայտման եւ մեղաւորներին պատասխանատուութեան կանչելու ուղղութեամբ:
Մենք երկար տարիներ սպասել ենք, որ կը գայ այն օրը, երբ մեր հարազատներին սպանողները կը կանգնեն արդարադատութեան առաջ եւ պատասխան կը տան օրէնքի ամբողջ խստութեամբ:
Նոր իշխանութիւնը մինչ այս պահը կատարել է անհրաժեշտ քայլեր, դրսեւորել է կամք մեր տարիների պահանջը կատարելու համար: Գտնում ենք, որ Մարտի 1-ին պետական մակարդակով կազմակերպած երթը այդ ոճրագործութեան բացայայտման քայլերից մէկն է, որը կ’ունենայ իր տրամաբանական շարունակութիւնը:
Կոչ ենք անում բոլորին իրենց մասնակցութիւնը բերել Մարտի 1-ի երթին` ի յիշատակ մեր հարազատների, որոնք իրենց կեանքը դրեցին Հայաստանի ազատութեան եւ ժողովրդավարութեան համար»։