Եւրոմիութեան ու Համաշխարհային դրամատան կողմէ Հայաստանին յատկացուած աւելի քան 730 միլիոն եւրոյի ծրագրի իրականացումը կը մօտեցնէ Երևանն ու Պրիւքսէլը՝ «Ազատութեան» հետ զրոյցի ժամանակ ըսած է Հայաստանի մէջ Եւրոմիութեան պատուիրակութեան ղեկավար, դեսպան Փիոթր Սվիթալսքին:
«Օրեր առաջ Եւրոմիութիւնն ու Համաշխարհային դրամատունը յայտարարեցին ենթակառուցուածքային մեծ ծրագրի՝ TEN-T-ի մասին, որու նպատակն է բարելաւել հաղորդակցական, փոխադրական ենթակառուցուածքները Արեւելեան Եւրոպայի մէջ: Սա շատ կարեւոր նախաձեռնութիւն է, որ կ’օգնէ խթանելու տնտեսութիւնը, բարելաւելու՝ կեանքի որակն ու հաղորդակցութիւնը: Հաղորդակցութիւնը Եւրոմիութեան ռազմավարական նպատակներէն է: Կ’ուզենք, որ Արեւելեան Եւրոպայի երկիրները աւելի լաւ կապուած ըլլան, եւ յոյսով եմ, որ այս ծրագրի իրականացումը իրական օգուտներ կը բերէ նաեւ Հայաստանին: Այս ծրագիրը տպաւորիչ գումար կը նախատեսէ Հայաստանի մէջ իրականացուելիք նախագիծերու համար: Թոյլ տուէք նշել, որ TEN-T-ի ծրագրին մէջ տեղ գտած նախագիծերը ընտրուած են թեխնիքական չափորոշիչներու հիման վրայ, ինչը կը նշանակէ, որ որոշիչ եղած է տուեալ երկրի կարիքը, ծրագրերը, թէ որքան ճկուն է կառավարութիւնը ծախսեր ընելու ժամանակ, եւ ծրագրերու հասունութիւնը: Այս ծրագրին մէջ քաղաքական որեւէ տարր չկայ: Այս ծրագիրը կազմուած է՝ հիմք ընդունելով տնտեսական, նիւթական եւ թեխնիքական չափորոշիչները», – մանրամասնած է դեսպանը:
«Որոշ ծրագրեր արդէն կեանքի կոչուած են Հայաստանի մէջ: Թոյլ տուէք ընդգծել, որ Եւրոմիութիւնը էական աջակցութիւն կը ցուցաբերէ «Հիւսիս-Հարաւ» միջանցքին: Եւրոմիութիւնը աւելի քան 10 միլիոն եւրօ դրամաշնորհ յատկացուցած է, ինչպէս նաեւ աւելի քան 60 միլիոն եւրօ վարկ՝ Ներդրումներու եւրոպական դրամատունէն: Ներկայիս իրականացուող մէկ այլ ծրագիր է Վանաձորէն, Ալավերդիի մօտէն մինչեւ Վրաստանի հետ սահման վերանորոգուող ճանապարհը, եւ այս ծրագրին արդէն իսկ յատկացուած է աւելի քան 30 միլիոն եւրօ վարկ, բացի այդ պիտի տրուի 5 միլիոն եւրօ դրամաշնորհը: Տեղեակ էք, որ մեր առաջնահերթութիւններու ցանկին այլ նախագիծեր ալ կան, օրինակ Մեղրիի անցակէտի կառուցումը: Եւրոմիութիւնը արդէն յատկացուցած է աւելի քան 10 միլիոն եւրօ՝ օգնելու Հայաստանին բարելաւելու սահմանահատումներու կառավարման որակը: Այժմ մենք ուշադրութիւն կը դարձնենք հարաւային սահմանին: Վստահ եմ, որ հաղորդակցութեան այս հսկայական ծրագիրը իրար պիտի մօտեցնէ Հայաստանը ու Եւրոմիութիւնը», – նշած է Հայաստանի մէջ Եւրամիութեան պատուիրակութեան ղեկավարը:
