Home ԳԼԽԱՒՈՐ ԼՈՒՐԵՐ Համաշխարհային Դրամատունը Նկատելիօրէն Բարելաւած է Հայաստանի Տնտեսական Աճի Ցուցանիշը

Համաշխարհային Դրամատունը Նկատելիօրէն Բարելաւած է Հայաստանի Տնտեսական Աճի Ցուցանիշը

by MassisPost

Համաշխարհային դրամատունը (ՀԴ) նկատելիօրէն բարելաւած է Հայաստանի՝ 2018, 2019 եւ 2020 թուականներու տնտեսական աճի վերաբերեալ իր կանխատեսումները եւ հրապարակուած Global Economic Prospects զեկոյցին մէջ նշած է, որ անցած տարին Հայաստանը փակած է 5,3 տոկոս տնտեսական աճով:

Զեկոյցը կը հրապարակուի կէս տարին անգամ մը, եւ 2018 թուականի յունիսին լոյս տեսած նախորդ զեկոյցին մէջ կը կանխատեսուէր, որ 2018 թուականը Հայաստանի տնտեսութիւնը պիտի փակէ 4,1 տոկոս աճով:

Ինչպէս ըսինք, բարելաւուած են նաեւ այս ու գալիք՝ 2020 թուականին վերաբերող տուեալները: Եթէ 2018-ի յունիսի Global Economic Prospects-ի համաձայն, 2019-ին Հայաստանի համախառն ներքին արդիւնքը (ՀՆԱ) պէտք է աճէր 4 տոկոսով, նոյնքան ալ՝ 2020 թուականին, ապա այսօրուան հրապարակման մէջ կանխատեսուած է, որ 2019-ին Հայաստանի տնտեսութիւնը պիտի աճի 4,3 տոկոսով, իսկ 2020-ին՝ 4,6 տոկոսով: Նոյն՝ 4,6 տոկոս տնտեսական աճ կանխատեսուած է 2021 թուականին համար:

Տնտեսագէտ, Հայ ազգային քոնկրեսի ներկայացուցիչ Վահագն Խաչատրեանի խօսքով, անցած տարի Հայաստանի տնտեսութիւնը հիմնական աճած է ծառայութիւններու ոլորտի հաշւոյն:

«Մենք գիւղատնտեսութիւնում խնդիրներ ենք ունեցել, արդիւնաբերութեան հետ կապուած, հանքարդիւնաբերութեան հետ կապուած որոշակի խնդիրներ, եւ նաեւ շինարարութեան որոշակի աճ է եղել։ Եւ իրականում բոլոր էն անհանգստութիւնները, որոնք կապուած էին ապրիլեան դէպքերից յետոյ, որ դրանք բացասական կ’ազդեն տնտեսութեան վրայ, թէկուզ թեմփի առումով իրականում որոշակի նուազում եղաւ, բայց ընդհանուր այն կանխատեսումները, որ կային, որոնք նաեւ անում էին միջազգային կառոյցներն, այդ թւում նաեւ՝ Արժոյթի [միջազգային] հիմնադրամը, դեկտեմբեր ամսին աւելի շուտ իր մօտ նաեւ ճշգրտումներ կատարեց, խօսում էին նրա մասին, որ այդ տնտեսական աճը աւելին կը լինի, քան տարուայ համար նախատեսւում էր», – «Ազատութեան» հետ զրոյցի ժամանակ ըսած է Վահագն Խաչատրեանը։

Անցած տարուան հայաստանեան թաւշեայ յեղափոխութեան ընթացքին, անկէ ետք նախորդ վարչակազմի ներկայացուցիչները բազմիցս իրենց մտահոգութիւնները կը յայտնէին, թէ յեղափոխական զարգացումները անկայունութիւն կ’առաջացնեն երկրին մէջ, որն ալ բացասական ազդեցութիւն կը ձգէ տնտեսութեան վրայ:

Հայաստանի 2018 թուականի պետական պիւտճէի համաձայն, անցած տարին երկիրը պէտք է փակէր 4,5 տոկոս տնտեսական աճով: Համաշխարհային դրամատունը գնահատած է, որ աճը աւելի բարձր է:

2018-ի տնտեսական աճի վերաբերեալ պաշտօնական տուեալները Հայաստանի մէջ դեռ չեն ամփոփուած, թէեւ Տնտեսական զարգացման եւ ներդրումներու նախարարի պաշտօնակատար Տիգրան Խաչատրեանը անցած տարուան նոյեմբերին կանխատեսած էր, որ 2018 թուականի տնտեսական աճը պիտի ըլլայ 5-էն 6 տոկոսի միջեւ:

Հարակից Նյութեր

Leave a Comment