Միջազգային Հանրապետական Հիմնարկի իրականացուցած հարցախոյզի համաձայն՝ հայաստանցիներու մեծամասնութիւնը լաւատես է երկրի ապագայի եւ Նիկոլ Փաշինեանի կառավարութեան նկատմամբ:
Հարցախոյզի մասնակիցներու 67 տոկոսը նշած է՝ եթէ ընտրութիւնները տեղի ունենային յաջորդ Կիրակի, ապա կը քուէարկէին «Քաղաքացիական պայմանագրի», 10 տոկոսը՝ «Լուսաւոր Հայաստանի», 9-ը՝ «Բարգաւաճ Հայաստանի», 3-ը «Սասնայ ծռերի», 2-ը՝ Հանրապետականի, 2-ը՝ Դաշնակցութեան օգտին:
Պատասխանողներու 61 տոկոսը ըսած է, որ երբեք չընտրեր Հանրապետականը, 18-ը՝ ԲՀԿ-ը, 17-ը՝ «Օրինաց երկիրը», 16-ը՝ ՀՅԴ-ն:
Պատասխանողներու 82 տոկոսը ըսած է, որ իր ամենասիրելի գործիչը Նիկոլ Փաշինեանն է, 81-ը դրական կարծիք յայտնած է նախագահ Արմէն Սարգսեանի, 77-ը՝ ԱԱԾ տնօրէն Արթուր Վանեցեանի մասին: Անոնց 82 տոկոսը ըսած է, որ նոր կառավարութեան «շատ դրական» եւ «համեմատաբար դրական» կը վերաբերի: 63 տոկոսը արագ քաղաքական փոփոխութիւններու ցանկութիւն յայտնած է, 73 տոկոսը կը կարծէ, որ Հայաստանը ճիշդ ուղիի վրայ է, եւ 81 տոկոսը համոզուած է, որ երկրին մէջ իրավիճակը ապագային պիտի բարելաւուի:
Պատասխանողներու մեծամասնութիւնը Փաշինեանի կառավարութենէն կ’ակնկալէ աշխատատեղերու ստեղծում, ընկերային-տնտեսական խնդիրներու լուծում, թոշակներու ու աշխատավարձերու բարձրացում: Նախկին կառավարութեան ձախողումը կը համարեն առաջին հերթին կաշառակերութիւնը, թալանը, արտագաղթը, անիշխանութիւնը եւ մենաշնորհները:
Հարցախոյզը իրականացուած է 9-29 հոկտեմբերին՝ 1200 քաղաքացիի շրջագիծէն ներս:
