«Ատրպէյճանի տիրող քաղաքական միջավայրի մէջ ազատ եւ արդար ընտրութիւններու իրականացումը անհնար է»: Պաքուի մէջ կայացած մամուլի ասուլիսի ժամանակ նման յայտարարութեամբ հանդէս եկած են Ապրիլ 11-ի նախագահական ընտրութիւններու գործընթացին հետեւող միջազգային դիտորդները:
«Ատրպէյճանի մէջ արտահերթ նախագահական ընտրութիւնները կայացած են սահմանափակումներով աչքի զարնող քաղաքական միջավայրի մէջ եւ այնպիսի օրէնքներու առկայութեամբ, որոնք կը կրճատեն մարդու հիմնարար ազատութիւններն ու իրաւունքները»,- նշուած է ԵԱՀԿ դիտորդներու տարածած յայտարարութեան մէջ:
«Ընտրարշաւը աչքի ինկաւ բազմակարծութեան բացակայութեամբ: Այդ կը վերաբերէր նաեւ ատրպէյճանական լրատուամիջոցներուն: Ընտրութիւններու առանձնայատկութիւններէն էր իրական ազատութեան բացակայութիւնը»,- նաեւ նշած են արեւմտեան դիտորդները` արձանագրելով, որ թէ՛ քուէարկութեան ընթացքը, եւ թէ՛ քուէներու հաշուարկը աչքի ինկան լուրջ խախտումներով: Այս մասին, մասնաւորաբար, յայտարարած է դիտորդական առաքելութեան ղեկավարներէն մէկը` ԵԱՀԿ Խորհրդարանական վեհաժողովի անդամ Նիլզա Տէ Սենան:
Իշխանամէտ լրագրողները դիտորդներու ասուլիսը ընդհատացած են՝ զանոնք մեղադրելով, որպէս հայերու շահերը սպասարկելու, զեկոյցի մէջ իրականութեան չհամապատասխանող տեղեկութիւններ տարածելու համար, ապա պահանջած փոփոխութեան ենթարկել ողջ փաստաթուղթը: ԵԱՀԿ դիտորդները ստիպուած 20 վայրկեանով ընդհատած են զեկոյցի հրապարկումը:
Ատրպէյճանի Կեդրոնական ընտրական յանձնաժողովը, սակայն, պնդած է, որ Ապրիլ 11-ի քուէարկութիւնը համապատասխանած է բոլոր միջազգային չափանիշներուն: Անոնց համաձայն` Իլհամ Ալիեւի օգտին քուէարկած է ընտրութիւններուն մասնակցած Ատրպէյճանի քաղաքացիներու 86 տոկոսը: Առաջադրուած թեկնածուները աննշան թիւով քուէներ ստացած են, առաւելագոյնը՝ 3,5 տոկոս: ԿԸՀ նախագահ Մազահիր Փանահովի յայտարարութենէն անմիջապէս ետք ատրպէյճանական ալիքները հեռարձակած են Իլհամ Ալիեւի հետեւեալ ուղերձը:
«Սիրելի հայրենակիցներ, ես կը ցանկանամ իմ երախտագիտութիւնը յայտնել՝ իմ հանդէպ նման վստահութիւն ցուցաբերելու համար: Այսօր Ատրպէյճանի ժողովուրդը քուէարկեց կայունութեան, անվտանգութեան եւ զարգացման օգտին»: Ալիեւը կրկին յայտարարած է. «Մենք լուրջ դիւանագիտական յաղթանակներ արձանագրած ենք: Միաժամանակ, մենք մեծ յաղթանակի հասած ենք ռազմի դաշտին վրայ: Ատրպէյճանցի զինուորը, ատրպէյճանական բանակը ազատագրեցին մեր հողերու մէկ մասը: Կու գայ օր մը, երբ այսօր դեռեւս գրաւման տակ գտնուող տարածքներու մէջ եւս կը ծածանի ատրպէյճանական դրօշը եւ այնտեղ ալ նախագահական ընտրութիւններ կ’իրականացուին»:
Ատրպէյճանական ընդդիմութիւնը, սակայն, չէ ընդունած ընտրութիւններու արդիւնքներու օրինականութիւնը: «Մուսավաթ» կուսակցութիւնը նշած է, որ արտահերթ նախագահական ընտրութիւններու իրականացումը ի սկզբանէ հակասահմանադրական է:
Ապրիլ 14-ին ատրպէյճանական ընդդիմութիւնը հանրահաւաք պիտի կատարէ բողոքելով նախագահական ընտրութիւններու կեղծման դէմ: