Թուրքիոյ նախկին ռազմական դատախազ Ահմէթ Զեքի Ուչոք անդրադարձած է այն հարցին, թէ ինչ կրնար տեղի ունենալ, եթէ 2016թ. Յուլիսի 15-ի յեղաշրջման փորձը չձախողէր: Թրքական իշխանամէտ «Yeni Akit» թերթի կայքի տեղեկացմամբ, Ուչոք կարծիք յայտնած է, որ այդ պարագային Թուրքիոյ մէջ արիւնահեղութիւն տեղի պիտի ունենար:
Թուրք դատախազի խօսքով, եթէ յեղաշրջումը յաջողութեամբ աւարտէր, Թուրքիա պիտի մասնատուէր. երկրի հարաւ-արեւելքը քրտական, իսկ արեւելքը՝ հայկական պետութիւններ պիտի ստեղծուէին: Միեւնոյն ժամանակ, Ուչոք տեսակէտ յայտնած է, թէ այդ պարագային Թուրքիա նոյնպէս պիտի անցնէր ԱՄՆ-ի մանդատին տակ:
Թուրքիոյ մէջ ահաբեկչական խմբաւորում համարուող Կիւլէնական համայնքի (FETÖ) անդամներուն դէմ առաջին հետաքննութիւնը յարուցած դատախազը մասնաւորապէս նշած է.
«Թուրքիա պիտի մասնատուէր, յետոյ երկրին մէջ մեծ կոտորածներ պիտի սկսէին: Անոնք ոչ թէ դատարանին առջեւ պիտի կանգնեցնէին, այլ նոյն յեղաշրջման ընթացքին ուղղակի պիտի սպանէին բոլոր անոնք, զորս ընդդիմադիր պիտի համարէին: Իսկ յեղաշրջումէն ետք իշխանութեան եկած նոր դէմքերը անկասկած պիտի ըլլային այն երկիրներու դրածոները, որոնց հետախուզական կառոյցներուն հետ անոնք կապուած են»: