Այս օրերուն երբ հայութիւնը կը պատրաստուի նշելու Մեծ Եղեռնի 102-ամեակը, Ամերիկեան շարժապատկերի սրահներու մէջ պիտի սկսի Հայկական Ցեղասպանութեան մասին պատմող «Խոստումը» ֆիլմի ցուցադրութիւնը:
«Խոստումը» հոլիվուտեան բարձր որակով պատրաստուած Ցեղասպանութեան մասին առաջին ֆիլմն է, որու վրայ ծախսուած է 100 միլիոն տոլար: Այդ գումարի մեծ մասը տրամադրուած է յայտնի բարերար Քըրք Քըրգորեանի կողմէ` նախքան իր մահը:
«Խոստումը» ֆիլմի լայն մաշտաբով բացումը պիտի կատարուի Ապրիլ 21-ին, 2000 պաստարներու վրայ` ամբողջ Ամերիկայի տարածքին:
Ֆիլմի աջակցութեան արշաւին միացած են հայ եւ օտար աստղեր եւ քաղաքական գործիչներ, որոնց շարքին Քարտաշեան քոյրերը, երգչուհի Շեր, երգիչ Էլթոն Ճոն, դերասան Ճորճ Գլունի, ՄԱԿ-ի մէջ Ամերիկայի նախկին ներկայացուցիչ Սամաթա Փաուըր եւ ուրիշներ: Նշանաւոր այս դէմքերը ունին միլիոնաւոր հետեւողներ` իրենց ընկերային ցանցերուն վրայ ու այդ միջոցաւ մեծապէս պիտի նպաստեն ֆիլմի տարածման ու յաջողութեան:
«Խոստումը» ֆիլմին զօրակցութիւն յայտնած է նաեւ «Մարդկային Իրաւանց Հսկիչ» (Human Rights Watch) միջազգային իրաւապաշտպան կազմակերպութիւնը:
Ֆիլմի յաջողութեան գծով մեծ դեր ունի կատարելիք նաեւ Ամերիկահայութիւնը: Ցուցադրութեան տարբեր ժամերուն, հայաշատ քաղաքներու մէջ լեցնլով սրահները, կարելի պիտի ըլլայ ապահովել ֆիլմի երկարաձգումը` յաջորդ շաբաթներուն եւս: Առաջին օրերուն ֆիլմի արժանացած ընդունելութիւնը` Ամերիկացի հասարակութեան կողմէ, պիտի գայ որոշելու անոր հետագայ ճակատագիրը:
Ապրիլեան այս շաբաթավերջին, «Խոստումը» ֆիլմին սատարելը մեզմէ իւրաքանչիւրի պարտականութիւնն է:
«ՄԱՍԻՍ»