Նախընտրական գործընթացներում դպրոցների տնօրէնների անօրինական ներգրաւուածութեան մասին վկայող «Իրազեկ քաղաքացիների միաւորում» հասարակական կազմակերպութեան նախապատրաստած եւ հրապարակած նիւթը փայլուն ապացոյցն է այն բանի, թէ ինչպէս են հայաստանեան իշխանութիւններն օգտագործելով իրենց ձեռքի տակ եղած իշխանական ռեսուրսը եւ լծակները նախապատրաստւում, իսկ այնուհետեւ իրականացնում «ընտրութիւններ» կոչուող միջոցառումը։ Հասարակական կազմակերպութիւնն ի ցոյց էր դրել վիճակը միայն մէկ ոլորտում։
Վստահօրէն կարելի է պնդել, որ մնացած բոլոր ոլորտներում էլ՝ համատիրութիւններից սկսած մինչեւ նախարարութիւններ, մանկապարտէզներից մինչեւ բուհեր, պիզնէս կառոյցներ ու տարաբնոյթ աշխատանքային քոլեկթիւներ նոյն վիճակն է։ Ամենուր կազմուել են ցուցակներ եւ կախուածութեան մէջ գտնուող ընտրողներին պարտադրել են քուէարկել իշխանական կուսակցութեան օգտին։ Այսպէս եղել է միշտ եւ այս անգամ այլ կերպ լինել չէր կարող։
«Իրազեկ քաղաքացիների միաւորում» հ/ կ այս հրապարակումը ոչ զարմացնող էր եւ ոչ էլ անակնկալ, բայց որպէս փաստագրուած նիւթ չափազանց արժէքաւոր է։ Նիւթի՝ իր անհերքելիութեամբ արժէքաւոր լինելն է պատճառը, որ ՀՀ իշխանութիւնները գրոհ են սկսել այս կազմակերպութեան ու նրա ղեկավար Դանիէլ Իոնիսեանի դէմ։ Իշխանութիւնների նախաձեռնութեամբ Իոնիսեանի դէմ դատական գործ սկսելը, ցինիզմի բարձրագոյն դրսեւորում լինելով հանդերձ նաեւ քաղաքացիական հասարակութեանն ուղղուած նախազգուշացում է։
Ովքեր կը համարձակուեն փաստարկուած, հասցէական ու անհերքելի ապացոյցներով ի ցոյց դնել ընտրական գործընթացում կամ որեւէ այլ բնագաւառում իշխանութիւնների իրականացրած անօրինականութիւններն ու խարդախութիւնները, կը թիրախաւորուեն իշխանութիւնների կողմից ու կ’ենթարկուեն ամենախիստ ու տարատեսակ հետապնդումների։
«Իրաւունքի եւ ազատութեան կեդրոն» հ/կ կարծում է, որ Դանիէլ Իոնիսեանի դէմ իրականացուող այս յարձակումը պէտք է դիտարկել որպէս յարձակում ուղղուած ողջ քաղաքացիական հասարակութեան դէմ եւ առաջարկում է հայաստանեան հասարակական կազմակերպութիւններին, իրաւապաշտպան կառոյցներին, ոչ իշխանական քաղաքական կուսակցութիւններին ու գործիչներին հնարաւոր բոլոր միջոցներով սատարել Դանիէլ Իոնիսեանին։
«Իրաւունքի եւ ազատութեան կեդրոն» հ/կ
Նախագահ՝ Վարդան Յարութիւնեան
