Անցեալ շաբաթավերջին Ատրպէյճանի պաշտպանական արդիւնաբերութեան նախարար Եաւէր Ճամալով յայտարարեց, թէ Պաքու կը պատրաստուի Իսրայէլէն գնել հակահրթիռային պաշտպանութեան «Երկաթէ գմբեթ» համակարգը։ Իսրայէլեան The Jerusalem Post -ը փաստեց, որ Ատրպէյճանի մէջ սկսած են անով հետաքրքրուիլ, երբ Հայաստանը ձեռք բերած է ռուսական «Իսկանտեր»-ը:
«Յատկանշական է, որ Իսրայէլի վարչապետ Բենիամին Նաթանիահուի այցէն անմիջապէս առաջ Պաքու մեկնած էր՝ Ռուսիոյ փոխվարչապետ, ռազմաարդիունաբերական ոլորտի պատասխանատու Տիմիթրի Ռոկոզինը»,- փաստած են ամերիկացի վերլուծաբանները՝ պնդելով, որ Պաքու այդ այցի ընթացքին նախապէս տեղեկացուցած է Ռուսիոյ, թէ ինչ համակարգ ձեռք կը բերէ Իսրայէլէն, եւ որ առաւել կարեւոր է՝ արդեօ՞ք այդ կը խախտէ ռազմական հաւասարակշռութիւնը, որը Մոսկուա կը պահէ Ատրպէյճանի եւ Հայաստանի միջեւ:
«Այնուամենայնիւ, իսրայէլական օդային պաշտպանութեան այդ համակարգը ձեռք բերելու նպատակը յստակ չէ»,- կարծիք յայտնած է Strarfor-ը՝ մանրամասնելով. «Ատրպէյճանը արդէն S 300 եւ «Պարաք-8» համակարգեր ունի, որոնք արդիւնաւէտ են «Իսկանտեր»-ի հրթիռներուն դէմ»:
«Բաւարար թիւով մարտկոցներ ունենալու պարագային անգամ «Երկաթէ գմբեթ»-ը իր թոյլ կողմերը ունի. անոր մարտկոցները կրնան դժուարութեամբ դիմակայել «Իսկանտեր»-ի հեռահար հրթիռներուն, քանի որ այն նախատեսուած է նախեւառաջ հրետանային փոքր հրթիռներու եւ ականանետերու կրակահերթերէն եկող վտանգը չէզոքացնելու համար: Թէեւ, հազիւ Ղարաբաղի լարուածութիւնը հասնի այն մակարդակին, որուն ականատեսը դարձանք այս տարուան սկիզբը, այնուամենայնիւ, վիճակը կրնայ սրիլ», – ընդգծած են ամերիկացի վերլուծաբանները՝ աւելցնելով, որ «Երկաթէ գմբեթ»-ը կրնայ օգնել շփման գիծի մօտ գտնուող քաղաքներն ու ռազմական յենակէտերը պաշտպանելու ատեն:
