Հայաստանի առաջին նախագահ Լեւոն Տէր-Պետրոսեանը ilur.am կայքին վրայ հանդէս եկած է նոր կառավարութեան ուղղուած առաջարկութիւններով:
«Կասկած չ′ունենալով, որ Կարէն Կարապետեանը վարչապետի պաշտօնն ստանձնել է երկրի տնտեսական վիճակն առողջացնելու ազնիւ մղումով, կարծում եմ, որ նա առաջին հերթին պէտք է նկատի ունենայ հետեւեալ անժխտելի իրողութիւնը:
Հայաստանի բոլոր չարիքների` սոցիալական ծանրագոյն վիճակի, բնակչութեան աղքատութեան, զանգուածային արտագաղթի, բանակի թերզինուածութեան, ապօրինի ընտրութիւնների, արդարադատութեան չգոյութեան, ժողովրդավարութեան եւ մարդու իրաւունքների ոտնահարման արմատը կոռուպցիան է` պետական պաշտօնեաների կողմից ազգային հարստութեան համատարած ու անյաք թալանը:
Ուստի կառավարութեան առջեւ կանգնած ամենահրատապ խնդիրը պէտք է լինի կոռուպցիայի դէմ պայքարի ոչ թէ ձեւական, այլ յիրաւի արդիւնաւէտ մեխանիզմների կիրառումը, ինչի համար անհրաժեշտ է.
- Վերացնել նախարարութիւնների, պետական այլեւայլ գերատեսչութիւնների, ինչպէս եւ տեղական ինքնակառավարման մարմինների արտաբիւճետային հաշիւներն ու հիմնադրամները:
- Անմիջապէս վաւերացնել ՄԱԿ-ի Հակակոռուպցիոն կոնվենցիայի` պետական պաշտօնեաների ապօրինի հարստացմանը վերաբերող 20-րդ յօդուածը»:
Ըստ Տէր-Պետրոսեանի, եթէ կառավարութեան ծրագրում այս երկու դրոյթները չ′ընդգրկուեն, ապա Հայաստանի տնտեսական վիճակի բարելաւման ու զարգացման յոյս փայփայելն անիմաստ կը դառնայ, իսկ նոր կառավարութիւնը կ′արժանանայ նախորդ երկուսի բախտին:
«Այս առաջարկները թէեւ նորութիւն չեն ու բազմիցս արծարծուել են, բայց մինչ այժմ մնացել են «ձայն բարբառոյ յանապատի»:
Մինչեւ Հայաստանում կոռուպցիան արմատախիլ չ′արուի, ոչ մի վարչապետ, որքան էլ կարող, որեւէ յաջողութեան չի հասնի եւ կարճ ժամանակ անց կը դառնայ հերթական քաւութեան նոխազը:
Իշխանաւորների անյագութեան ու կոռուպցիայի պատճառով մենք կարող ենք ոչ միայն մեր անկախութիւնը, այլեւ Ղարաբաղն ու Հայաստանը կորցնել:
Սա է, որ խորապէս պէտք է գիտակցի նոր կառավարութիւնը եւ քաջութիւն ու վճռականութիւն դրսեւորի մեծագոյն այդ չարիքը յաղթահարելու գործում: Այլապէս, համակարգային բարեփոխումների վերաբերեալ նրա ցանկացած խոստում կը մնայ սոսկ դատարկ զրոյց»,- գրած է Լեւոն Տէր-Պետրոսեանը: