Արարատի մարզի Մասիս քաղաքի հին կաշուէ գործարանին կիսաքանդ շէնքին մէջ արդէն 8 տարի ծանր ընկերային պայմաններու մէջ բնակող Աւետիսեաններու 5 հոգանոց ընտանիքի 3 անչափահաս երեխաները Սեպտեմբեր 1-ին կրկին դպրոց պիտի երթան հին հագուստով ու մաշած կօշիկներով։ Նոր հագուստի եւ նոր գրենական պիտոյքներու մասին երազող երեխաները Սեպտեմբեր 1-ի առաւօտեան պիտի արթնանան միւս երեխաներուն նման ո՛չ թէ բարձր տրամադրութեամբ, այլ՝ հակառակը. պատառոտուած կօշիկներով, հարեւաններուն տուած պայուսակներով եւ մաշած հագուստով՝ ձեռք ձեռքի բռնած, տխուր ու արցունքոտ աչքերով դպրոց պիտի երթան: 39-ամեայ Կարինէ Աւետիսեան կը պատմէ՝ ինքն ու իր 39-ամեայ ամուսինը՝ Ռուստամ Աւետիսեանը, ամէն ինչ կ՛ընեն, որ իրենց երեխաները գոնէ Սեպտեմբեր 1-ին բարձր տրամադրութեամբ արթնանան, հին հագուստի պատճառով չամչնան հասակակիցներէն, սակայն, ընտանեկան պիւտճէն, որ ամսական 25 հազար դրամ է, բաւարար չէ նոյնիսկ օրուան հացին համար:
«Արդէն քանի տարի է Սեպտեմբեր 1-ին նոյն պատմութիւնն է. երեխաներն առաւօտեան արթնանում են, հագնում են հին շորերը, տխուր տրամադրութեամբ, իրար ձեռք բռնած գնում են դպրոց: Այս տարի նորից ոչինչ չի փոխուել, էլի նոյն հին հագուստը, պայուսակները….ու էլի Սագուլիկս առանց կօշիկների»,- կը յայտնէ տիկին Կարինէն։
Ընտանիքին մայրը կը նշէ՝ երեք անչափահաս երեխաները՝ Խաչիկը, Սարգիսն ու Լուսինէն, հին ու մաշած հագուստի, պատառոտուած կօշիկներու պատճառով հասակակիցներուն կողմէ մերժուած են. դասարանէն ներս ընկերներ չունին:
«Գալիս են տուն ու պատմում, որ հասակակիցները խնդում են, որ մաշուած հագուստով են, հետներն ընկերութիւն չեն անում…մի խօսքով, ահաւոր վիճակ է: Չեմ էլ կարողանում երեխաներիս բացատրել, թէ ինչու ենք էս վիճակում»:
Կարինէ Սուքիասեանն ու ամուսինը 15 տարի առաջ ամուսնացած են, երկուքն ալ անապահով ընտանիքէ, այդ պատճառով ալ յայտնուած են ծանր դրութեան մէջ։ 7 տարի առաջ բնակուած են Եղեգնաձորի գիւղերէն մէկուն յարակից սարերուն վրայ՝ վրաններու մէջ, դրամով անասուններ պահած, սակայն անմարդկային պայմաններուն չդիմանալով, եկած են Մասիս՝ լքուած ու կիսաքանդ գործարանի տարածքին բնակութիւն հաստատած։ Մօտակայքը ոչ մէկ բնակելի տուն կայ, իրենք եւս՝ հնարաւոր է, շուտով կորսնցնեն այն կիսաքանդ կառոյցը, ուր այժմ կը բնակին. «Ամուսնուս ծնողները շատ վատ պայմաններում էին ապրում, որոշեցինք գնալ Եղեգնաձոր՝ սարերում փողով անասունների նայել ու այդպէս ապրել։ 5 տարի կարողացանք մի կերպ վրաններում ապրել, սակայն անմարդկային պայմաններ էին եւ մեզ օգնելու համար բարեկամներիցս մէկն առաջարկեց գալ ու մնալ Մասիսում, փողով կով կթել, մի քիչ փող աշխատել»:
Տիկին Կարինէն կը խնդրէ բարի մարդոց աջակցութիւնը երեխաներուն համար գոնէ նուազագոյն պայմաններ ապահովող տուն ունենալու համար՝ խոնաւ ու ցուրտ կիսակառոյց գործարանի մէջ ապրող անոնց 3 անչափահաս երեխաներուն առողջութիւնը վտանգուած է:
Աւետիսեաններու ընտանիքին օգնել ցանկացողները կրնան հեռաձայնել 098937341 հեռաձայնի թիւին:
