ՀՀ ԱԺ նախագահ Ալէն Սիմոնեան Ազգային Ժողովին մէջ ընդունած է Հիւսիսային Եւրոպայի եւ Պալթեան երկիրներու ձեւաչափի (Nordic-Baltic) խորհրդարաններու նախագահներու ու փոխնախագահներու ղեկավարած պատուիրակութիւնը: Հիւրընկալուած պատուիրակութեան կազմին մէջ էին Էսթոնիոյ Ռիիկիքոկուի նախագահ Լաուրի Եուսարը, Լաթվիայի Սայեմայի խօսնակ Տաիկա Միերինյան, Ֆինլանտայի Էտուսքունթայի խօսնակ Եուսսի Հալլա-ահոն, Նորվեկիոյ Սթորթինկի նախագահ Մասուտ Ղարահխանին, Դանիոյ Ֆոլքեթինկի փոխխօսնակ Քարսթըն Հոնկէն, Լիթուանիոյ Սեյմասի փոխխօսնակ Եուոզաս Օլեքասը, Շուէտի Ռիքստակի նախագահի տեղակալ Քէնեթ Ֆորսլունտը եւ բազմաթիւ այլ պաշտօնեաներ:
Ընդլայնուած կազմով տեղի ունեցած քննարկման, որուն մասնակցած են նաեւ ՀՀ ԱԺ պատգամաւորներ, Ալէն Սիմոնեան շնորհակալութիւն յայտնած է Հայաստան ժամանած պաշտօնեաներուն՝ նշելով, որ այսպիսի բարձրագոյն կազմով պատուիրակութեան այցը շատ կարեւոր է Հայաստանի Հանրապետութեան համար. «Ազգային Ժողովի եւ անձամբ իմ անունից խորապէս գնահատում եմ բոլոր պատուիրակութիւնների Հայաստան այցելելու յանձնառութիւնը՝ մեր երիտասարդ ժողովրդավարութեանն աջակցելու համար: Հայաստանը մեծ նշանակութիւն է տալիս ձեւաչափի իւրաքանչիւր երկրի հետ իր յարաբերութիւններին՝ թէ՛ որպէս երկկողմ գործընկերներ, թէ՛ որպէս Եւրամիութեան անդամներ կամ կապակցուած երկրներ: Հայաստանը շարունակում է հաւատարիմ մնալ ժողովրդավարական բարեփոխումների իր յանձնառութեանը, որն էական նշանակութիւն ունի կայուն զարգացման, լաւ կառավարման, օրէնքի գերակայութեան եւ մարդու իրաւունքների ոլորտում առաջընթացի համար: Մենք երախտապարտ ենք բարեփոխումների հարցում ձեր շարունակական աջակցութեան համար»,- նշած է ՀՀ ԱԺ նախագահը:
Հիւսիսային Եւրոպայի եւ Պալթեան երկիրներու ձեւաչափի խորհրդարաններու նախագահներն ու փոխնախագահները իրենց հերթին շնորհակալութիւն յայտնած են Ալէն Սիմոնեանին ջերմ ընդունելութեան համար ու նշած, որ տպաւորուած են Հայաստանով: Վերջիններս իրենց անվերապահ աջակցութիւնը յայտնած են Հայաստանի տարածքային ամբողջականութեան եւ նշած, որ բարձր կը գնահատեն Հայաստանի՝ տարածաշրջանին մէջ յարատեւ խաղաղութիւն հաստատելու ջանքերը: Անոնք նաեւ շեշտած են Հայաստանի՝ եւրոպական համարկման գործընթացին սատարելու պատրաստակամութիւնը՝ ընդգծելով, որ պատրաստ են իրենց ներդրումը ունենալու այդ ճանապարհին:
Զրուցակիցները անդրադարձած են նաեւ միջխորհրդարանական համագործակցութեան, Հայաստան-ԵՄ յարաբերութիւններուն, Հայաստանի մէջ ընթացող բարեփոխումներուն եւ տարածաշրջանային զարգացումներուն վերաբերող այլ հարցերու:
