ՀՀ ԱԳՆ-ն յայտարարութիւն տարածած է Ատրպէյճանի կողմէ յարձակման հետեւանքով ԼՂ բնակչութեան տեղահանութեան եւ միջազգային հանրութեան կողմէ ձեռնարկուելիք անհրաժեշտ քայլերուն մասին։
Յայտարարութեան մէջ ըսուած է․
«Մէկ տարի առաջ Սեպտեմբերի 19-ին Ատրպէյճանի կողմից ռազմական յարձակման հետեւանքով Լեռնային Ղարաբաղի ամբողջ բնիկ բնակչութիւնը՝ աւելի քան 115.000 հայ, մի քանի օրուայ ընթացքում ստիպուած եղաւ լքել սեփական բնակավայրերը։
«Այս տեղահանութիւնը, որը ցեղային զտման քաղաքականութեան վերջին փուլն էր, տեղի ունեցաւ ՄԱԿ Գլխաւոր Վեհաժողովի նստաշրջանի ընթացքում, երբ ողջ միջազգային հանրութիւնը հերթական անգամ քննարկում էր հակամարտութիւնների խաղաղ կարգաւորման, կայունութեան հաստատման ու զարգացման հրամայականը՝ դատապարտելով ուժի կիրառման, միջազգային կանոնների, մարդու իրաւունքների խախտումների դրսեւորումներն աշխարհի տարբեր անկիւններում։
«Անցնող մէկ տարուայ ընթացքում ՀՀ կառավարութիւնը, այդ թւում նաեւ՝ միջազգային գործընկերների աջակցութեամբ, ձեռնարկեց բոլոր անհրաժեշտ քայլերը՝ հասցէագրելու ԼՂ տեղահանուած հայերի առաջնային եւ միջնաժամկէտ կարիքները, ինչպէս նաեւ մշակելու երկարաժամկէտ հեռանկարում անհրաժեշտ ծրագրեր։
«Յաջորդ շաբաթ Նիւ Եորքում կրկին մեկնարկելու են ՄԱԿ Գլխաւոր Վեհաժողովի բարձրաստիճան քննարկումները. վերջին մէկ տարուայ իրադարձութիւններն ի ցոյց են դնում միջազգային կայունութեան ապահովման ուղղութեամբ անյետաձգելի ջանքերի, խաղաղութեան հաստատման հնարաւորութիւն տվող գաղափարների, քայլերի կեանքի կոչման կարեւորութիւնը։
«Հարաւային Կովկասում կայունութեան ապահովման հարցում Հայաստանի Հանրապետութեան դիրքորոշումը յստակ է. խաղաղութեան եւ յարաբերութիւնների շուտափոյթ հաստատում՝ հիմնուած ինքնիշխանութեան եւ տարածքային ամբողջականութեան յարգման, տարածաշրջանում կայուն զարգացման, արդիւնաւէտ փոխկապակցուածութեան, բարեկեցութեան ապահովման տեսլականի վրայ։
«Վերջինիս կեանքի կոչման՝ այս պահին առկայ հնարաւորութիւնը բաց չթողնելու եւ սերունդների համար առաւել կայուն ու արժանապատիւ կեանքի համար նպաստաւոր միջավայր ձեւաւորելու նպատակով այս հարցում շահագրգիռ միւս դերակատարներից ակնկալում ենք անհրաժեշտ քաղաքական կամքի եւ խաղաղութեան օրակարգին յանձնառությեան յստակ դրսեւորում»։
