ԹԱՍՍ-ին տուած հարցազրոյցին այս մասին յայտնած է Ռուսաստանի արտաքին գործերու փոխնախարար Միխայիլ Կալուզինը։
«Այսօր Հայաստանի առջեւ ծառացած բազմաթիւ վտանգներ կրնան մեղմացուիլ, եթէ 2022 թուականին Երեւանը համաձայնէր ՀԱՊԿ-ի միջոցով Ատրպէյճանի հետ սահմանին իրավիճակի կայունացման միջոցառումներու համալիր իրականացնելու առաջարկին: Ցաւօք, Հայաստանի ղեկավարութիւնը նախընտրեց հրաւիրել ԵՄ առաքելութիւնը, որ ամենեւին ալ չի պաշտպաներ պետութեան սահմանները, այլ «դիտարկումի» անուան տակ զբաղուած է Ատրպէյճանի, Իրանի եւ Ռուսաստանի դէմ հետախուզական տուեալներու հաւաքագրմամբ»,- յայտնած է դիւանագէտը:
Ինչպէս ընդգծած է Կալուզինը, ՀԱՊԿ-ի պարագային «խօսքը լուրջ նախաձեռնութիւններու մասին էր, այդ շարքին՝ ռազմատեխնիկական օգնութեան, դիտորդական առաքելութիւն ուղարկելու, սահմանապահ զօրքերու պատրաստման հարցով օգնութեան»։
Միխայիլ Կալուզին ըսած է որ, Հայաստանը դադրած է հետաքրքրութիւն ցուցաբերել Ռուսաստանի հետ շփումներու նկատմամբ արտաքին գործերու եւ պաշտպանութեան նախարարութիւններու միջոցով, ինչ որ Արեւմուտքի ճնշման արդիւնքն է:
«2023 թուականի Նոյեմբերէն ի վեր արտաքին գործերու նախարարներու հանդիպումներ չեն եղած։ Գործընկերները հետաքրքրութիւն չեն ցուցաբերած արտաքին գործերու նախարարութիւններու միջեւ խորհրդակցութիւններու մէկ այլ ծրագիր մշակելու եւ կնքելու վերաբերեալ: Գերատեսչութիւններուն մէջ նկատելիօրէն նուազած է նաեւ ռազմատեխնիկական համագործակցութիւնը։ Այնուամենայնիւ, մենք կ’ակնկալենք խնդրայարոյց հարցերու եւ գրգռիչներու վերացման ուղղութեամբ աշխատելու՝ Հայաստանի իշխանութիւններուն հրապարակային մտադրութիւնը, մենք պատրաստ ենք անոր»,- ընդգծած է Կալուզինը։
Միաժամանակ արտաքին գործերու փոխնախարարը նշած է, որ Մոսկուայի եւ Երեւանի միջեւ երկկողմ շփումները չեն ընդհատուիր։
«Օրերս՝ Մայիս 8-ին՝ Եւրասիական Բարձրագոյն Տնտեսական Խորհուրդի հերթական նիստի շրջանակներուն մէջ, տեղի ունեցաւ Ռուսաստանի նախագահ Վլատիմիր Փութինի եւ Հայաստանի վարչապետ Նիկոլ Փաշինեանի հանդիպումը»,- նշած է արտաքին գործերու փոխնախարարը։
Ան յաւելած է, որ առեւտրատնտեսական ոլորտին մէջ երկիրները ունին ամենազգալի արդիւնքները: «Տնտեսական համագործակցութեան երկկողմանի միջկառավարական յանձնաժողովը արդիւնաւէտ կ’աշխատի փոխվարչապետներու՝ Ալեքսէյ Օվերչուքի եւ Մհեր Գրիգորեանի համագործակցութեամբ»,- եզրափակած է Կալուզինը:
