«Ընդհանուր առմամբ իշխանութեան աշխատանքը դրական եմ գնահատում անցնող տարում: Տեղի ունեցաւ այն տեղաշարժը, որին ժողովուրդը սպասում էր վերջին երկու տասնամեակում: Ժողովրդի ծարաւը յագեցուեց»,- «Առաջին լրատուական»-ի հետ զրոյցի ժամանակ ամփոփելով անցնող տարին, ըսած է քաղաքագէտ Արկադի Վարդանեանը: Ան, սակայն, ատոր հետ մէկտեղ իշխանութեան աշխատանքին մէջ շատ շօշափելի բացթողումներ կը տեսնէ, որոնցմէ ամենակարեւորը կը համարէ այն, որ իշխանութեան կողմէ այդպէս ալ չհնչեց իրաւաքաղաքական գնահատական «նախկին յանցաւոր իշխանութեան վերաբերեալ»։ «Չասուեց, որ, օրինակ, այսուհետեւ ՀՀԿ-ն ընկալւում է ոչ թէ որպէս քաղաքական կուսակցութիւն, այլ որպէս կազմակերպուած յանցաւոր խմբաւորում, որը իր իշխանութեան տարիների օրօք բազմաթիւ յանցագործութիւններ է իրականացրել Հայաստանի, հայ ժողովրդի եւ Հայաստանի պետականութեան դէմ: Դրանով վերջ կը դրուէր բոլոր այն վայրահաչոցներին, որոնք մինչ օրս շարունակւում են աշոտեանների, շարմազանովների եւ այլոց կողմից: Նրանք այլեւս չէին վայրահաչի, քանի որ այլեւս ցանկացած վայրահաչոցով կ’ընկալուէր որպէս օրէնքի կոպիտ խախտում՝ համապատասխան հետեւանքներով: Դա չանելը, անշուշտ, իշխանութեան կողմից մեծ բացթողում էր»,- ըսած է Վարդանեանը:
Վերջինիս խօսքերով՝ ցաւոտ բացթողում է նաեւ սահմանադրական ճգնաժամը չհանգուցալուծելը: «Մենք բոլորս գիտենք, թէ ինչով էր զբաղուած Սահմանադրական դատարանը՝ յատկապէս Գագիկ Յարութիւնեանի գլխաւորութեամբ: Այդ կառոյցը հլու-հնազանդ դակում էր իշխանութեան կողմից կատարուած յատկապէս ընտրական յանցագործութիւնները, եւ ժողովրդին դա մատուցւում էր որպէս օրինական գործընթաց: ՍԴ-ն տարիներ շարունակ օրինականացրել է իշխանութեան յանցագործութիւնները, որը ծանրագոյն յանցագործութիւն է: Եւ ես զարմանում եմ, որ դեռ մի քանի հոգի՝ վարդեւանեաններ, արծուիկմինասեաններ, մելիքշահնազարեաններ, էլ «քինտըր սիւրփրիզ» դաւիթյարութիւնեաններ եւ այլոք փորձում են մարդկանց համոզել, թէ անկախ դատական կառոյցի նկատմամբ իշխանութեան ոտնձգութիւնները ոչ այլ ինչ են, քան յանցագործութիւն՝ մոռանալով այն մասին, որ երբ իրօք յանցագործութիւններ էին տեղի ունենում Սահմանադրութեան եւ ժողովրդի իրաւունքների նկատմամբ, իրենք ձայն չէին հանում: Ես կարծում եմ, որ իշխանութիւնները շատ են յապաղում եւ շատ հրատապ լուծումներ պահանջող հարցերի դէպքում են յապաղում»- ընդգծած է Վարդանեանը:
Արկադի Վարդանեանի խօսքերով՝ 2020 թուականին իշխանութիւնները առաջին հերթին պէտք է լուծեն սկզբունքային հարցեր եւ շեշտը դնեն քաղաքական ռազմավարութեան վրայ: Ոչ այնքան մարտավարութեան, որքան ռազմավարութեան։ «Այդ տեսանկիւնից, ես համամիտ եմ Ժիրայր Սեֆիլեանի մտքի հետ՝ առաջարկելով իշխանութեանը ստեղծել ազգային համաձայնութեան կառավարութիւն, որը, որպէս գործիքակազմ, շատ աւելի արդիւնաւէտ է, քան այն քայլերը, որոնք ձեռնարկում է իշխանութիւնը։ Մենք բոլորս շատ ուրախ ենք, որ մեր ժողովուրդը իր երկրում վերջապէս սովորեց ազատ շնչել, որ մեր երկրի քաղաքական դաշտից վերջապէս հեռացուեցին այնպիսի յանցագործներ, ինչպիսին են Ռոպերթ Քոչարեանը, Սերժ Սարգսեանն ու իրենց շրջապատը, բայց դրա հետ միասին հարկաւոր է յեղափոխութեան տրամաբանութեանը համապատասխան քայլեր ձեռնարկել: Դա պարտադիր է: Ցանկացած յեղափոխութիւն ենթադրում է 180 աստիճանի շրջադարձ, բայց մենք առայժմ դա չենք տեսնում: Դա դեռ շօշափելի չէ, որն էլ ժողովրդի մօտ տարակուսանք է առաջացնում, եւ այդ տարակուսանքը քայլ առ քայլ վերածւում է անընդունելիութեանը, որը շատ վտանգաւոր է: Մեր իշխանութիւնները պէտք է այս ուղղութեամբ խոր մտածեն եւ քայլեր ձեռնարկեն»,- եզրափակած է Վարդանեանը:
