Բանալով քննարկումը՝ Փաշինեանը մասնաւորապէս ըսած է. – «Գիտէք, որ աշխատանքային խումբ էր գործում, եւ այդ խմբի գործունէութեան արդիւնքում արդէն իսկ ունենք Հայաստանի Հանրապետութեան օրէնքի նախագիծ, որը կոչւում է «Ապօրինի ծագում ունեցող գոյքի բռնագանձման մասին օրէնք»:
«Սա շատ կարեւոր թեմայ է, եւ վերջին ամիսների ընթացքում տարբեր հարթակներում քննարկումների առիթ է տուել: Որոշ դէպքերում նոյնիսկ կան մեկնաբանութիւններ, որ փորձ է արւում ներկայացնել, թէ արտակարգ դատարանին բնորոշ գործառոյթներ են փորձ արւում ներդնել, եւ երբեմն այնպիսի տպաւորութիւն է, թէ այս թեման սկսել է քննարկուել Հայաստանում տեղի ունեցած ոչ բռնի, թաւշեայ, ժողովրդական յեղափոխութիւնից յետոյ, եւ այս հարցերի շուրջ պարզաբանումներն ամբողջական չեն եղել», – նշած է վարչապետը՝ մանրամասնելով․ – «Առանց մեղադրական դատավճռի գոյքի բռնագանձման անհրաժեշտութեան մասին նախեւառաջ նշւում է ՄԱԿ-ի Կաշառակերութեան դէմ պայքարի 2004 թուականի համաձայնագրին մէջ: Վերջինիս համաձայն՝ երկրները պէտք է անհրաժեշտ միջոցառումներ իրականացնեն առանց մեղադրական դատավճռի գոյքի բռնագանձում թոյլատրելու համար այն դէպքերում, երբ յանցագործը չի կարող քրէական հետապնդման ենթարկուել մահուան, թաքնուելու, նրա բացակայութեան կամ այլ համանման դէպքերում: Հայաստանի Հանրապետութիւնն այս համաձայնագիրը վաւերացրել է առանց որեւէ վերապահման՝ 2007 թուականին»:
«Առանց մեղադրական դատավճռի գոյքի բռնագանձում ասելով երբեք չի կարելի հասկանալ, որ գոյքը բռնագանձւում է առհասարակ առանց դատարանի որոշման: Առանձնայատկութիւնը կայանում է նրանում, որ բռնագանձումը կատարւում է ոչ թէ քրէական դատավարութեանը, այլ քաղաքացիական դատավարութեանը բնորոշ կանոններով», – նաեւ նշած է վարչապետը:
Ան թուարկած է միջազգային փաստաթուղթերը, որոնցով այս հիմնարկը կը կարգաւորուի, մասնաւորապէս՝ Կաշառակերութեան դէմ ՄԱԿ-ի համաձայնագիրը եւ «Յանցաւոր ճանապարհով ստացուած եկամուտներու լուացման, հետախուզման, առգրաւման ու բռնագրաւման եւ ահաբեկչութեան ֆինանսաւորման դէմ պայքարի մասին» Եւրոպայի խորհուրդի համաձայնագիրը, որոնք վաւերացուած են Հայաստանի կողմէ:
«Սա բնականոն գործընթաց է, ըստ էութեան, որ տեղի է ունենում Հայաստանի Հանրապետութիւնում: Եւ, ի հարկէ, այստեղ կայ նաեւ որոշակի առնչութիւն քաղաքական գործընթացների հետ, որովհետեւ մեծ հաշուով դժուար էր հաւատալ, որ առանց երկրում տեղի ունեցած քաղաքական փոփոխութիւնների իրական քայլեր կ’արուէին՝ այս ինստիտուտն իրականում ներդնելու համար: Բայց հիմա մենք խնդիր ունենք ոչ միայն այս ինստիտուտն ուղղակի ներդնել, այլ խնդիր ունենք լուծել հետեւեալ հարցերը՝
- Որպէսզի մենք համոզուած լինենք, որ սա գողացուած միջոցների վերադարձի գործուն մեխանիզմ է:
- Որ սա քաղաքական վրէժխնդրութեան գործիք լինել չի կարող:
- Որ այս ողջ գործընթացի ընթացքում մենք ի վիճակի կը լինենք ապահովել մարդու իրաւունքների լիարժէք պաշտպանութիւնը», – յայտարարած է Հայաստանի կառավարութեան ղեկավարը:
Փաշինեանը ընդգծած է, որ «Ապօրինի ծագում ունեցող գոյքի բռնագանձման մասին» օրէնքը պէտք է թիրախաւորէ կաշառակերութեան մէջ ներգրաւուած պաշտօնատար անձերը, փողերու լուացմամբ զբաղողները, յանցաւոր խմբաւորումներու անդամները:
Կառավարութեան ղեկավարը յանձնարարած է ամփոփել ներկայացուած օրէնքի նախագիծը եւ ուղարկել միջազգային փորձաքննութեան: