Իսրայէլի ընդդիմադիր «Եշ Ատիդ» կուսակցութեան առաջնորդ Յաիր Լապիդ յայտարարած է Հայոց ցեղասպանութեան ճանաչման մասին Քնեսետէն ներս բանաձեւ ներկայացնելու իր կուսակցութեան մտադրութեան մասին, կը յայտնէ Times of Israel թերթը:
Յաիր Լապիդ ըսած է, որ Իսրայէլի եւ Թուրքիոյ միջեւ հաշտեցումը դիւանագիտական սխալ էր, նաեւ կոչ ըրած է «թաղել» Թուրքիա գազատարի նախագիծը եւ աջակցիլ «անկախ Քուրտիստանի պետութեան ստեղծման»:
Լապիդ Թուրքիոյ նախագահ Ռեջէփ Թայիփ Էրտողանին քննադատած է, որ ան Հայոց ցեղասպանութիւնը չէ ճանչցած: «Անոնք, որոնք կը ժխտեն Հայոց ցեղասպանութեան ժամանակ երեխաներու սպանութիւնը, չպէտք է բարոյականութիւն քարոզեն», նշած է Լապիդ:
Վերջին օրերուն Իսրայէլցի քաղաքական գործիչները խստօրեն կը քննադատեն Էրտողանը, ԱՄՆ նախագահ Տոնալտ Թրամփի կողմէ Երուսաղէմը Իսրայէլի մայրաքաղաք ճանչնալուն ի պատասխան, քաղաքը Պաղեստինի մայրաքաղաք հռչակելու մասին անոր կատարած առաջարկին պատճառաւ: