Անցեալ Շաբաթ օր՝ 28 Հոկտեմբերին, Հալէպի մէջ հանդիսաւոր կերպով նշուած է Ն.Ս.Մ.Մ. հիմնադրութեան 60 ամեակը: Այս առթիւ կազմակերպուած ճաշկերոյթ-պարահանդէսը տեղի ունեցած է Հալէպի նշանաւոր «Ուաննէս» ճաշարանէն ներս:
Բացման խօսքը կատարած է Տիկ. Մարալ Խանզադեան, որ իր խօսքին մէջ անդրադարձած է Նոր Սերունդ Մշակութային Միութեան առաքելութեան, եւ կարեւորելով 60-ամեայ այս միութեան կատարած աշխատանքները, ան նաեւ յոյս յայտնած է, որ միութիւնը անտեսելով Հալէպի դժուարին պայմանները՝ պիտի շարունակէ իր առաքելութիւնն ու գործունէութիւնը:
Երեկոն անցած է բաւական ճոխ մթնոլորտի մէջ, ուր հանդէս եկած է նաեւ հալէպահայ յայտնի երգիչ Յակոբ Այնթէպլեան, որ իր ազգային եւ ժողովրդական երգերով խանդավառ մթնոլորտ մը ստեղծած է ներկաներուն համար:
Միջոցառման ընթացքին խօսք առած է հալէպահայ բեմադրիչ Գրիգոր Քէլէշեան, որ նաեւ նշած է, որ Ն.Ս.Մ.Մ.-ը հալէպահայ մշակութային կեանքին մէջ կարեւոր դեր ունեցած միութիւն է, նշելով, որ Նոր Սերունդի ճիգերով Հալէպի մէջ հիմնուած է հայկական առաջին թատերախումբը, որուն հետ ինք տարբեր առիթներով համագործակցած է: Քէլէշեան նաեւ յոյս յայտնած է որ միութիւնը կը շարունակէ իր հայանուէր գործունէութիւնը, կամուրջ հանդիսանալով Սուրիոյ հանրութեան եւ հայութեան միջեւ:
Աւարտին խօսքով հանդէս եկած է Ն.Ս.Մ.Մ. Հալէպի ատենապետ Տիար Շահէ Մինասեան: Ան իր խօսքով կարեւորած է մշակութային գործունէութեան շարունակականութիւնը, յաւելելով, որ յետայսու միութիւնը նոր եռանդով եւ նոր թափով պիտի շարունակէ իր աշխատանքները:
Մինասեան նաեւ ըսած է, Ն.Ս.Մ.Մ.-ը մեծ յարգանք կը վայելէ Սուրիոյ մշակութային շրջանակներուն մէջ եւ միութեան անունը ոսկի տառերով գրուած է Սուրիահայ համայնքի զարգացման գործին մէջ:
Հանդիսութեան աւարտին տեղի ունեցած է կարկանդակի հատում եւ բոլոր ներկաները շնորհաւորած են միութեան վարչական կազմը եւ պատասխանատուները, այս գեղեցիկ առիթին համար:
Նշենք, որ 60-ամեայ մշակութային միութիւնը յառաջիկային եւս հանդէս պիտի գայ յաւելեալ միջոցառումներով:
«Արեւելք»