Home ԻՐԱՒՈՒՆՔ Իրաւապաշտպանները Դատապարտած են Վահան Արծրունիի Հետապնդումը

Իրաւապաշտպանները Դատապարտած են Վահան Արծրունիի Հետապնդումը

by MassisPost

Յայտնի երաժիշտ Վահան Արծրունին յայտարարած է, որ իրեն երկու օր առաջ զանգահարած է Գրիգոր անունով մէկը, ներկայանալով որպէս ՀՀ ազգային անվտանգութեան ծառայութեան աշխատակից, հրաւիրած է զրոյցի ԱԱԾ: Այդ մասին ըսուած է իրաւապաշտպան կազմակերպութիւններու տարածած յայտարարութեան մէջ։

«ԱԱԾ-ում մօտ 40 րոպէ տեւած զրոյցի ընթացքում Վահան Արծրունուն տուել են այնպիսի հարցեր, որոնցով կամեցել են պարզել նրա քաղաքական դիրքորոշումը, մասնակցե՞լ է արդեօք հանրահաւաքների եւայլն: Հարցաքննութիւնը չի արձանագրուել, Վահան Արծրունուն չեն իրազեկուել նրա իրաւունքները հրաւէրի եւ ոչ պաշտօնական հարցաքննութեան ընթացքում: ԱԱԾ-ում ունեցած զրոյցից յետոյ երաժշտի ֆեյսպուքեան էջը ընկերների համար արգելափակուել է:

Տեղի ունեցածը մենք գնահատում ենք որպէս ոչ միայն քաղաքացու ազատութիւնների եւ իրաւունքների կոպիտ ոտնահարում, այլեւ անթաքոյց ահաբեկում, ենթադրաբար, այն հաշուով, որ մարդիկ խուսափեն ազատօրէն արտայայտել իրենց կարծիքը, ինքնագրաքննուեն, չմասնակցեն այն հաւաքներին, որոնք անցանկալի են իշխանութիւնների համար, դադարեն քաղաքացի լինել եւ վերածուեն հարկատու կամակատարների:

ԱԱԾ-ն քաղաքացուն առանց ծանուցագրի հրաւիրելով ոչ պաշտօնական հարցաքննութեան, կատարել է անօրինական գործողութիւն, ինչը պէտք է իրաւական եւ քաղաքական գնահատականների արժանանայ հասարակական, քաղաքական ուժերի եւ ՀՀ գլխաւոր դատախազութեան կողմից:

ՀՀ ԱԱԾ ղեկավար Գ.Կուտոյեանից պահանջում ենք միջոցներ ձեռնարկել՝ կանխելու ԱԱԾ-ի կողմից «ՆԿՎԴ-ԿԳԲ»-ի գործելաոճը, թոյլ չտալու համար քաղաքացիների նկատմամբ ապօրինութիւն, դադարեցնել քաղաքացիների ահաբեկման փրաքթիքան, վարչական քննութեան ենթարկել Վահան Արծրունու հետ կապուած այս միջադէպը եւ պատասխանատուութեան ենթարկել զանցառուներին: ԱԱԾ պաշտօնեաները պէտք է գործեն բացառապէս ժողովրդավարական եւ իրաւական պետութեան սկզբունքներին համապատասխան, հասկանան, որ ՀՀ ազգային անվտանգութեան հենքը ազատ քաղաքացիներն են եւ նրանցով ստեղծուած իրաւական պետութիւնը, եւ ոչ թէ վերադաս իշխանութիւնը ու իրաւազուրկ քաղաքացին: Ազգային անվտանգութեան հաստատման համար հարկաւոր է քաղաքացուն պաշտպանել անօրէն իշխանութիւնից եւ ոչ թէ անօրէն իշխանութեանը՝ ազատ քաղաքացիներից»:

Յայտարարութիւնը ստորագրած են Հայաստանի Հելսինկեան կոմիտէն, Լրագրողներու «Ասպարէզ» ակումբը, Հելսինկեան քաղաքացիական խմբակցութեան Վանաձորի գրասենեակը եւ Բաց հասարակութեան հիմնադրամներ-Հայաստանը։

Հարակից Նյութեր

Leave a Comment