Լրագրողական շարք մը կազմակերպութիւններ համատեղ յայտարարութիւն տարածած են «Ռոսսիա-1»-ի եթերով Վլասիմիր Սոլովյովի հնչեցուցած մեկնաբանութիւններուն ու որակումներուն առնչութեամբ։
«Վլատիմիր Սոլովյովը փաստացի Քրեմլի կարկառուն քարոզիչներից մէկն է, ու կարելի է եզրակացնել, որ նա արտայայտել է Ռուսաստանի իշխանական ատեաններում առկայ դիրքորոշումը, որը հետագայ օրերին որեւէ կերպ չի հերքուել։
«Այսպիսով, եւս մէկ անգամ ակնյայտ է դառնում, որ ռուսաստանեան իշխանութիւններին մօտ կանգնած շրջանակները եւ մետիա աղբիւրները ջանում են աշխուժօրէն միջամտել Հայաստանի հասարակական-քաղաքական եւ նոյնիսկ իրաւական գործընթացներին՝ փորձելով ներազդել մեր երկրի ներքին իրավիճակի վրայ գալիք խորհրդարանական ընտրութիւններին ընդառաջ»,- մասնաւորապէս կ’ըսուի յայտարարութեան մէջ։
Յայտարարութիւնը՝ ստորեւ.
«Հայաստանեան լրատուամիջոցներում եւ ընկերային ցանցերում վերջին օրերին լայն արձագանգ են ստացել Յունիսի 18-ին «Ռոսսիա-1» հեռուստաալիքի եթերում «Երեկոն Վլատիմիր Սոովյովի հետ» հաղորդաշարի հեղինակ-վարողի հերթական անպարկեշտ եւ վիրաւորական արտայայտութիւններն ու որակումները ՀՀ իշխանութիւնների, պետութեան ու ժողովրդի հասցէին։
«Յիշեցնենք, որ Սոլովյովը, վրդովուելով Երեւանում ռուսաստանաբնակ հայազգի գործարար Սամուէլ Կարապետեանի ձերբակալման փաստից, ՀՀ իշխանութիւններին եւ մասնաւորապէս վարչապետին անուանել է սրիկայ, ծախու, «թուրքոլ» (թուրքամէտ) եւ տարակուսել՝ «Հայաստանի ժողովուրդը որեւէ մասնակցութիւն ունի՞ երկրի ճակատագրին վերաբերող հարցերին, թէ՞ շուտով Հայաստանը կ’արժանանայ Արցախի ճակատագրին․․․»։
«Եթէ հաշուի առնենք վերոյիշեալ հեռուստաընկերութեան պետական կարգավիճակը եւ այն, որ Վլատիմիր Սոլովյովը փաստացի Քրեմլի կարկառուն քարոզիչներից մէկն է, ապա կարելի է եզրակացնել, որ նա արտայայտել է Ռուսաստանի իշխանական ատեաններում առկայ դիրքորոշումը, որը հետագայ օրերին որեւէ կերպ չի հերքուել։
«Աւելին՝ նոյն առիթով նմանատիպ տեսակէտներ են յայտնել նաեւ իշխող «Ետինայա Ռոսսիա» կուսակցութեան պատգամաւորներ եւ Քրեմլի տրամադրութիւնները տարածող փորձագէտներ։ Այսպիսով, եւս մէկ անգամ ակնյայտ է դառնում, որ ռուսաստանեան իշխանութիւններին մօտ կանգնած շրջանակները եւ մետիա աղբիւրները ջանում են աշխուժօրէն միջամտել Հայաստանի հասարակական-քաղաքական եւ նոյնիսկ իրաւական գործընթացներին՝ փորձելով ներազդել մեր երկրի ներքին իրավիճակի վրայ գալիք խորհրդարանական ընտրութիւններին ընդառաջ։
«Յայտնի է, որ վերջին տարիներին արձանագրուել են բազմաթիւ դէպքեր, երբ ռուսական լրատուամիջոցները, այդ թւում՝ ՀՀ տարածքում հեռարձակուող ՌԴ պետական հեռուստաընկերութիւնը, խախտելով օրէնսդրական եւ մասնագիտական տարրական պահանջները, տարածել են ապատեղեկություն, կեղծ լուրեր, ատելութիւն եւ խտրականութիւն պարունակող բովանդակութիւն, ակնյայտ վիրաւորանք Հայաստանի հասցէին։
«Այդ դատապարտելի արշաւի առաջամարտիկներից եղել եւ մնում է վերոյիշեալ Սոլովյովը՝ իր կողմից հրաւիրուող «փորձագէտներով» հանդերձ։ Դա է պատճառը, որ նրա հաղորդումներն արգելափակուել են ՀՀ հանրային մուլթիփլեքսում, եւ նոյնիսկ հայ-ռուսական միջգերատեսչական բանակցութիւնների արդիւնքում այդ որոշումը չի վերանայուել։ Նման խնդիրներ են առաջացել նաեւ Հայաստանում գործող ռուսական այլ լրատուամիջոցների հետ։
«Քանի որ կիրառուած միջոցները բաւարար ազդակ չեն դարձել ՌԴ-ում որոշում կայացնողների համար, մենք՝ ներքոստորագրեալ լրագրողական կազմակերպութիւններս, պահանջում ենք ՀՀ կառավարութիւնից.
«խզել «Հայաստանի Հանրապետութեան կառավարութեան եւ Ռուսաստանի Դաշնութեան կառավարութեան միջեւ զանգուածային հեռահաղորդակցութեան ոլորտում համագործակցութեան մասին» համաձայնագիրը, ինչի համար կուտակուել են բազմաթիւ հիմնաւորումներ, եւ այդ քայլով իսկ դադարեցնել ռուսաստանեան հեռուստաալիքների հեռարձակումը ՀՀ հանրային մուլտիպլեքսով,
«անհրաժեշտ այլ միջոցառումներ ձեռնարկել եւ համապատասխան քննարկումներ կազմակերպել փորձագիտական հանրութեան հետ՝ Հայաստանի տեղեկատուական միջավայրը օտարերկրեայ հիպրիտային ազդեցութիւնից պաշտպանելու նպատակով։
ԽՕՍՔԻ ԱԶԱՏՈՒԹԵԱՆ ՊԱՇՏՊԱՆՈՒԹԵԱՆ ԿՈՄԻՏԷ
ԵՐԵՒԱՆԻ ՄԱՄՈՒԼԻ ԱԿՈՒՄԲ
ՄԵԴԻԱ ՆԱԽԱՁԵՌՆՈՒԹԻՒՆՆԵՐԻ ԿԵՆՏՐՈՆ
ԲԱԶՄԱԿՈՂՄԱՆԻ ՏԵՂԵԿԱՏՈՒՈՒԹԵԱՆ ԻՆՍՏԻՏՈՒՏ – ՀԱՅԱՍՏԱՆ
ԼՐԱԳՐՈՂՆԵՐԻ «ԱՍՊԱՐԷԶ» ԱԿՈՒՄԲ
«ԼՐԱԳՐՈՂՆԵՐ ՅԱՆՈՒՆ ԱՊԱԳԱՅԻ» ՀԿ
«ԼՐԱԳՐՈՂՆԵՐ ՅԱՆՈՒՆ ՄԱՐԴՈՒ ԻՐԱՒՈՒՆՔՆԵՐԻ» ՀԿ
ԳՈՐԻՍԻ ՄԱՄՈՒԼԻ ԱԿՈՒՄԲ»
