ՀՀ Արտաքին գործերու նախարարութիւնը յայտարարութեամբ հանդէս եկած է։
«հհ ԱԳ նախարարութիւնը խորապէս հիասթափուած է Իսլամական Համագործակցութեան Կազմակերպութեան նախարարական վերջին համաժողովի շրջանակներում ընդունուած «Սթամպուլի հռչակագրում» եւ Ատրպէյճանի նախաձեռնութեամբ ներկայացուած բանաձեւերում տեղ գտած խեղաթիւրուած եւ ծայրայեղ միակողմանի ձեւակերպումների առնչութեամբ։ Տուեալ փաստաթղթերում արտայայտուած շեշտադրումները հակասում են տարածաշրջանում տեւական խաղաղութեան հաստատման շահերին եւ տրամաբանութեանը։
«ԻՀԿ անդամ պետութիւնների ուշադրութիւնը հրաւիրում ենք այն փաստին, որ «արեւմտեան Ատրպէյճանի» խօսոյթը մարդու իրաւունքների քօղի ներքոյ Ատրպէյճանի կողմից յստակ տարածքային պահանջ է ՀՀ ինքիշխան տարածքի նկատմամբ, ինչը փաստվում է անգամ այդ նպատակով արհեստականօրէն ձեւաւորուած «կազմակերպութեան» հիմնադիր փաստաթղթերում։ Օգտակար ենք համարում յիշեցնել, որ արեւմտեան Ատրպէյճանը Ատրպէյճանի արեւմտեան շրջաններն են՝ Ղազախը, Թովուզը, Աղստաֆան, Գեդաբէյը, Դաշքեսանը, Քելբաջարը, Լաչինը, Կուբաթլուն, Զանգելանն ու Նախիջեւանը: Հայաստանի Հանրապետութեան տարածքում չկայ եւ չի կարող լինել այսպէս կոչուած «արեւմտեան Ատրպէյճան»։
«Ինչ վերաբերում է Խորհրդային Հայաստանում բնակուող ատրպէյճանցիներին, ապա նրանք ԽՍՀՄ գոյութեան վերջին տարիներին Հայաստանից հեռացել են կամաւոր, կարողացել են վաճառել կամ փոխանակել իրենց գոյքը կամ ստացել են փոխհատուցում Հայաստանի կառավարութիւնից։ Ցաւօք, նոյնը չի եղել հայերի ճակատագիրն Ատրպէյճանում՝ Պաքւում, Սումգայիթում եւ այլ վայրերում, որտեղ տեղի են ունեցել հայերի կոտորածներ եւ բռնի տեղահանում, իսկ նոյնօրինակ վերջին դրսեւորմանը մեր տարածաշրջանում աշխարհն ականատես եղաւ 2023թ. աշնանը, երբ աւելի քան 115.000 հայեր ստիպուած եղան լքել Լեռնային Ղարաբաղը՝ ենթարկուելով ցեղային զտման։
«ԻՀԿ կողմից նմանօրինակ վարքագծի անուղղակի խրախուսումը տրամանաբանական խզում է առաջացնում վերջին երկու տարիների ընթացքում Մերձաւոր Արեւելքում առկայ ճգնաժամի նկատմամբ ԻՀԿ դիրքորոշման հետ:
«Զարմանք է առաջացնում նաեւ Խոջալուի դէպքերի թիւր մեկնաբանութիւնը: Մարդկութեան դէմ ուղղուած յանցագործութիւնների իրական պատմութիւնը քաջ յայտնի է եւ ուղղակիօրէն ժխտում է Հայաստանի Հանրապետութեանն ուղղուած ցանկացած մեղադրանք։
«Ափսոսանք է առաջացնում այն, որ ընդունուած հռչակագիրը, շեղուելով ԻՀԿ անդամների կողմից ս.թ. Մարտին եւ յաջորդիւ արուած՝ Հայաստանի եւ Ատրպէյճանի միջեւ միջպետական յարաբերութիւնների հաստատման եւ խաղաղութեան մասին համաձայնագրի կնքման վերաբերեալ յայտարարութիւններից, պարունակում է համաձայնագրի ստորագրման ճանապարհին առկայ նախապայմանների վերաբերեալ միակողմանի արձանագրումներ։ ԻՀԿ անդամների ուշադրութիւնն ենք հրաւիրում այն հանգամանքին, որ Հայաստանը յայտարարել է համաձայնագիրն առանց որեւէ յետաձգման ստորագրելու պատրաստակամութեան մասին՝ առաջարկելով խորհրդակցութիւններ սկսել դրա ստորագրման վայրի եւ ժամկէտի շուրջ, ինչպէս նաեւ առաջարկել է կառուցողական լուծումներ գտնել Ատրպէյճանի կողմից բարձրացուող մի շարք հարցերի կապակցութեամբ: Տարածաշրջանում խաղաղութեան հաստատմամբ հետաքրքրուած գործընկերների կողմից առաւել տրամաբանական կը լինէր յորդորել Ատրպէյճանին առանց անհարկի յետաձգման ստորագրել համաձայնագիրը՝ զերծ մնալով այդ ճանապարհին արհեստական խնդիրներ յարուցելուց։
«Խոր ափսոսանք է առաջացնում նաեւ մշակութային արժէքների պաշտպանութեան վերաբերեալ ընդունուած բանաձեւը. անտեսնելով Ատրպէյճանի հսկողութեան ներքոյ հայկական մշակութային ժառանգութեան շարունակական ոչնչացումն ու դրա նկատմամբ համակարգուած վանտալիզմը՝ բանաձեւը հարցին փորձում է հաղորդել կրօնական երանգաւորում՝ սնելով թիւր եւ վտանգաւոր թեզեր։ Հայաստանի յարգանքը եւ հոգատար վերաբերմունքը իսլամական մշակութային ժառանգութեան նկատմամբ յայտնի է եւ հեշտութեամբ ապացուցելի:
«ԱԳ նախարարութիւնը կոչ է անում վերոնշեալ հռչակագրին եւ բանաձեւերին միացած Իսլամական Համագործակցութեան Կազմակերպութեան անդամ երկրներին՝ վերանայել եւ վճռականօրէն հրաժարուել Հայաստանի տարածքային ամբողջականութիւնն ու ինքնիշխանութիւնը թիրախաւորող եւ Հայաստանի եւ Ատրպէյճանի միջեւ կարգաւորման գործընթացը վտանգող կողմնակալ նախաձեռնություններից:
«Հարաւային Կովկասում առկայ է խաղաղութեան հաստատման իրական հնարաւորութիւն, որեւէ միջազգային կազմակերպութեան նման գործելաոճը չի նպաստում այդ հնարաւորութեան արդիւնաւէտ իրացմանը։ Հայաստանի Հանրապետութիւնը հաւատարիմ է խաղաղութեան օրակարգին իրացման ռազմավարութեանը եւ միջազգային գործընկերներին, այդ թւում Իսլամական Համագործակցութեան Կազմակերպութիւնից ակնկալում է աջակցութիւն Հայաստանի եւ Ատրպէյճանի միջեւ տեւական եւ կայուն խաղաղութիւն հաստատելու ջանքերին»,- կ’ըսուի յայտարարութեան մէջ։
