Սոցեալ Դեմոկրատ Հնչակեան Կուսակցութեան Ֆրանսայի Վարիչ Մարմինը պաշտօնական յայտարարութեամբ մը կը տեղեկացնէ, որ քաշուած է Ֆրանսայի Հայկական միութիւններն ու կազմակերպութիւնները համակարգող խորհուրդէն՝ CCAF-էն:
Կուսակցութեան յայտարարութեան մէջ մասնաւորապէս ըսուած է.
« Նախ եւ առաջ կը նկատենք հաւասար ներկայացուցչութեան բացակայութիւն՝ անհատներու եւ անհատական նախաձեռնութիւններու՝ շրջանային մակարդակի վրայ, հոն ուր միութենական աշխատանքը ամենաարդիւնաւէտն է:
«Երկրորդ, կը դատապարտենք պաշտօնի անսահմանափակ կուտակման անփոփոխութիւնը, որ թոյլ կու տայ քանի մը պատասխանատուի անվերջօրէն կառչած մնալ որոշումներ կայացնողի դիրքերուն: Իշխանութեան նման առեւանգում կը հակասէ վերանորոգման հիմնական պահանջին եւ կ՚ամրապնդէ դիրքը ղեկավարութեան մը, որ կը հակազդէ դոյզն փոփոխութեան փորձի, խափանելով վերանորոգման որեւէ հեռանկար, որ անհրաժեշտ է առողջ կազմակերպութեան մը համար:
«Բացի ատկէ, CCAF կը յաւակնի այնպիսի ներկայացուցչութեան մը, որ դուրս կը մնայ իր իրական սահմաններէն: Ան իրաւասութիւնն ունի արտայայտուելու մի՛այն իր անդամներուն անունով եւ սահմանափակ տարածքի մը մէջ: Յաւակնիլ ամբողջ հայկական գաղութին ներկայացուցչութեան՝ կը նշանակէ ինքն իրեն թոյլ տալ այնպիսի օրինականութիւն մը, որ գաղութը չէ պարգեւած իրեն:
«Եւ վերջապէս, մեզի համար անընդունելի է, որ նման կառոյցի անդամ մը իրաւազրկուի պաշտպանուելու հիմնական կարելիութենէն, երբ ներքաշուած է անհամաձայնութեան մը մէջ: Մերժել լսել կողմ մը՝ կը նշանակէ անարգել արդարութիւնը եւ ոտնակոխել թափանցկութեան սկզբունքը:
«Նկատի առնելով այս խոտորումները, մեզի համար բարոյապէս անհնար է կապակցուիլ նոյնանման համակարգի մը հետ, որուն կանոնները կը հակասեն մեր արժէքներուն: Այսու, Սոցիալ Դեմոկրատ Հնչակեան Կուսակցութիւնը կը բաժնուի CCAF-էն»:
