Եւրոպայի Խորհուրդի գլխաւոր քարտուղար Ալէն Պերսէ Առաջին ալիքի հետ հարցազրոյցին անդրադարձած է Հայաստանի եւ Ատրպէյճանի միջեւ համաձայնեցուած խաղաղութեան համաձայնագրի ստորագրման գործընթացին:
Ինչպէ՞ս կրնայ ԵԽ-ն ապահովել այս որոշման իրականացումը՝ հարցումին, Պերսէ պատասխանած է.
«Այս թեման մեզ կը հետաքրքրէ վաղուց: Ես խօսած եմ վարչապետ Փաշինեանի հետ շատ շուտ՝ այն պահէն, երբ համաձայնագրի պայմանները ընդունուած էին Հայաստանի կողմէ: Առիթ ունեցած նաեւ Ատրպէյճանի իշխանութիւններուն հետ խօսելու՝ ըսելով, որ մենք կ’ուզենք յառաջ երթալ այս հարցով, դուք ալ հետաքրքրուած էք, որ յստակութիւն եւ կայունութիւն ըլլայ, եւ Հայաստանը բաւականին կարեւոր քայլ ըրած է այս ուղղութեամբ:
«Կը կարծեմ, որ Եւրոպայի Խորհուրդը, երկխօսութեան հարթակ առաջարկելով այս հարցերուն շուրջ, եւս դեր կը կատարէ: Օրինակ՝ վերջերս Թուրքիա կը գտնուէի, ուր սա եւս թեմա է որպէս Հայաստանի հարեւան: Թուրքիոյ մէջ եւս խօսած եմ խաղաղութեան համաձայնագրի արագ ստորագրման անհրաժեշտութեան մասին:
«Վտանգներէն մէկը այն է, որ այս քննարկումը կրնայ շատ կարեւոր ըլլալ Կովկասի մէջ, բայց քիչ մը մոռցուի աշխարհի մէջ: Մեր նպատակն է յիշեցնել ասոր կարեւորութիւնը, շարունակել յառաջ տանիլ քննարկումները եւ ի վերջոյ հասնիլ վերջնական կէտին՝ Ատրպէյճանի վրայ բարեկամական ճնշում գործադրելով, եթէ կրնանք այսպէս ըսել:
«Բաւականին մեծ յառաջընթաց կայ վերջին ամիսներուն: Մեր խնդիրը այսօր այն է, որ շատ դանդաղ յառաջ կ’երթայ գործընթացը, բայց յառաջ կ’երթայ: Ինձ կը կը մտահոգէր, եթէ ամէն ինչ կանգ առնէր ամբողջապէս: Այսինքն՝ պէտք է պահպանենք այս շարժումը, որ ամէն ինչ տանինք դէպի ստորագրում, ինչ որ, յոյսով եմ, պիտի ըլլայ հնարաւորինս արագ»,- ըսած է Եւրոպայի Խորհուրդի գլխաւոր քարտուղարը:
