ՀՀ վարչապետ Նիկոլ Փաշինեան տիկնոջ՝ Աննա Յակոբեանի հետ, Փարիզի մէջ ներկայ գտնուած է Աստուածամօր տաճարի վերաբացման արարողութեան:
Միջոցառման ներկայ եղած են Ֆրանսայի նախագահ Էմանուէլ Մաքրոնը, ԱՄՆ ընտրուած նախագահ Տոնալտ Թրամփը, Գերմանիոյ նախագահ Ֆրանք-Վալթեր Շթայնմայերը, Իտալիոյ նախագահ Սերճիօ Մաթարելլան, Լեհաստանի նախագահ Անճէյ Տուտան, Խրուաթիոյ նախագահ Զօրան Միլանովիչը, Պուլկարիոյ նախագահ Ռումէն Ռատեւը եւ այլ երկիրներու առաջնորդներ, կառավարութիւններու ղեկավարներ:
Միջոցառման շրջանակին մէջ ելոյթով հանդէս եկած է Ֆրանսայի նախագահ Էմանուէլ Մաքրոնը, որ իր խօսքին մէջ անդրադարձած է Աստուածամօր տաճարի վերականգնման աշխատանքներուն եւ ընդգծած՝ տաճարի վերաբացման կարեւորութիւնը իր երկրին ու ժողովուրդին համար:
Յաջորդիւ Փարիզի արքեպիսկոպոս Լորան Ուլրիխը կատարած է եկեղեցական արարողութիւն:
Բարձրաստիճան հիւրերը շրջայց կատարած են Աստուածամօր տաճարին մէջ:
Երեկոյեան Նիկոլ Փաշինեան եւ Աննա Յակոբեան Էլիզէի պալատին մէջ մասնակցած են Էմանուէլ եւ Պրիժիթ Մաքրոններու անունով՝ ի պատիւ Փարիզի Աստուածամօր տաճարի վերաբացման արարողութեան մասնակից պետութիւններու եւ կառավարութիւններու ղեկավարներու տրուած պաշտօնական ընթրիքին:
