ՀՀ երկրորդ նախագահ Ռոպերթ Քոչարեանը եւ անոր նախկին ենթակաները՝ Սէյրան Օհանեանը, Եուրի Խաչատուրովը, Արմէն Գէորգեանը, ներկայացած են դատարան: Նախորդ նիստին դատարանը Քոչարեանը, Խաչատուրովը եւ Օհանեանը բերման ենթարկելու որոշում կայացուցած էր՝ այն յանձնարարելով Հայաստանի ոստիկանապետին:
Նիստին սկիզբը դատաւորը հետաքրքրուեցաւ․ «Ձեր ազատութիւնը սահմանափակուա՞ծ է»։ Քոչարեան ըսաւ՝ հարցումը չի հասկնար, պնդող հարցումին ի պատասխան՝ ըսաւ, որ ազատութիւնը չէ սահմանափակուած:
Ռոպերթ Քոչարեանին, ՀԱՊԿ նախկին գլխաւոր քարտուղար Եուրի Խաչատուրովին Մարտի 1-ի գործով նոր մեղադրանք ներկայացուեցաւ:
Հանրային մեղադրող Հայկ Յովհաննիսեանը այս գործով նիստի ընթացքին փոխեց անոնց վերագրուող արարքին իրաւական գնահատականը՝ նոր մեղադրանք առաջադրելով 2003-ի Ապրիլին ընդունուած ՀՀ Քրէական օրէնսգիրքի 309-րդ յօդուածի 3-րդ մասով՝ պաշտօնական լիազօրութիւնները անցնիլը, որ անզգուշութեամբ յառաջացուցած է ծանր հետեւանքներ. այն կը համապատասխանէ գործող ՀՀ Քրէական օրէնսգիրքի 441 յօդուածին:
