Հայաստանի եւ Իրանի արտաքին գործերու նախարարներ Արարատ Միրզոյեան եւ Ապպաս Արաղչի հեռախօսազրոյց ունեցած են։ Ըստ հայկական կողմին՝ անոնք խօսած են երկկողմ օրակարգի, փոխադարձ հետաքրքրութիւն ներկայացնող այլ հարցերու մասին։
Երկու հարեւան երկիրներու արտաքին քաղաքական գերատեսչութիւններու ղեկավարները քննարկած են նաեւ յառաջիկայ միջոցառումները: Սակայն, հաղորդագրութեան մէջ մանրամասնութիւններ չկան, թէ ինչ միջոցառումներու մասին է խօսքը, արդեօ՞ք քննարկուած է տարածաշրջանին մէջ ապաշրջափակման հարցը։
Իրանեան կողմը զրոյցին մասին դեռ չէ հաղորդած։
Պաշտօնական Թեհրան տեւական ժամանակէ կը պաշտպանէ երեւանի դիրքորոշումը տարածաշրջանի ապաշրջափակման հարցով եւ Ատրպէյճանէն հնչող սպառնալիքներու լոյսին տակ կը պնդէ՝ միջազգայնօրէն ճանչցուած սահմաններու փոփոխութիւն թոյլ պիտի չտայ։
Նախորդ շաբաթ՝ «Հայաստան-Իրան. համագործակցութիւն եւ հեռանկարներ» խորագրով փորձագիտական աշխատաժողովի ժամանակ Հայաստանի մէջ Իրանի դեսպանը ընդգծած էր՝ Թեհրան կ’ողջունէ Հայաստանի «Խաղաղութեան Խաչմերուկ» նախաձեռնութիւնը, սակայն կը կարծէ, թէ որեւէ ապաշրջափակում պէտք է իրականացուի տուեալ երկրի տարածքային ամբողջականութեան, ինքնիշխանութեան ու վերահսկողութեան ներքոյ։
