Օվեռն-ռոն-ալփ տարածաշրջանի վեց քաղաքի պատուիրակութիւնը՝ տարածաշրջանի փոխնախագահ եւ Վիենի քաղաքապետ Թիերի Քովաչի գլխաւորութեամբ այցելած է Հայաստանի ռազմավարական տարածաշրջան՝ Սիւնիք: Այդ մասին X-ի իր էջով տեղեկացուցած է Հայաստանի մէջ Ֆրանսայի դեսպան Օլիվիէ Տըքոթինյին:
«Նախագահ Լորան Վոքյէի նախաձեռնութեամբ երկու տարածաշրջաններուն միջեւ 2023 թուականի Մարտին հաստատուած յարաբերութիւնները կը զարգանան եւ կը խորանան»,- նշած է դիւանագէտը:
Ան տեղեկացուցած է, որ Պրոնի, Վյենի, Մոռնանի, Սեն Շամոնի, Մոնթելիմարի եւ Լէ Փյուի ան Վելէի ներկայացուցիչները հանդիպած են Սիւնիքի համայնքապետարաններուն մէջ գործընկեր քաղաքներու քաղաքապետներուն հետ: Սիւնիքի բոլոր քաղաքները շուտով քոյր քաղաքներ պիտի դառնան Օվեռն-ռոն-ալփ շրջանի քաղաքներուն հետ, յայտնած է դեսպանը։
