Շիրակի թեմի առաջնորդ Միքայէլ արքեպիսկոպոս Աջապահեանը գոհ չէ Հանրայինի ուղիղ եթերով Վազգէն (Բագրատ) Գալստանեանի ուղերձէն:
«Որ ասեմ գոհ եմ՝ սուտ ասած կը լինեմ, այնտեղ իր ելոյթի մէջ զգացւում էր յուզականութիւն եւ մի քիչ սթափութեան պակաս, ցաւօք»,- NEWS.am-ի հետ զրոյցին ըսած է ան:
Հարցումին՝ կէս ճանապարհէն ետ կանգնիլ հնարաւոր չէ՞, եթէ կը տեսնեն, որ չի յաջողիր, Միքայէլ սրբազանը պատասխանած է.
«Ես կարծում եմ, այո՛, պէտք է ինչ-որ բան փոխել, բայց պէտք է Բագրատ սրբազանը դրան անդրադառնայ: Ես ակնարկել եմ այս բոլոր ամիսներին, թէ ինչն է պատճառը իր որոշակի անյաջողութեան: Հիմա թերեւս աւելի բացայայտ կարող եմ ասել: Հիմնական պատճառը նախկին նախագահների ստուերն է եւ ուրուականը: Այդ ուրուականներից չի կարող ազատուել Բագրատ սրբազանը, այդ ուրուականների հեղինակներն իրենք պէտք է յայտարարեն իրենց հեռացման մասին եւ իրապէս հեռանան: Հայրենիքի փրկութիւնը դա պահանջում է, ու եթէ իրենք դա չեն անում, ուրեմն հայրենիքի փրկութեան մասին չեն մտածում, իրենք մտածում են իշխանութեան վերադառնալու կամ, այսպէս ասած, ընդդիմութեան իշխանութիւնը պահպանելու համար»:
Ան շեշտած է, որ ե՛ւ երկրորդ, ե՛ւ երրորդ նախագահները պէտք է հեռանան քաղաքական ասպարէզէն. «Սթափ բանականութիւնն ու հաշուարկը դա է պահանջում: Եթէ իրենք դա չգիտեն, նշանակում է՝ ոչ մի բան էլ չեն հասկանում: Ե՛ւ երկրորդ նախագահը, ե՛ւ իր որդին պէտք է յայտարարեն եւ փաստացի հեռանան: Նոյնը վերաբերում է երրորդ նախագահին, նա պէտք է բաց թողնի այդ ՀՀԿ-ին: Ինչպէս պատահական մտաւ, այդպէս պատահական էլ պէտք է դուրս գայ: Այլապէս ոչինչ հնարաւոր չէ»:
Ըստ Շիրակի թեմի առաջնորդին՝ վերջիններուս սխալներուն պատճառով ժողովուրդին ճնշող մեծամասնութիւնը անոնց անունը լսել չ’ուզեր:
«Պէտք է դա հասկանան, իսկ իրենք անում են հակառակը, փորձում են Բագրատ սրբազանի մօտ ստեղծել այն տպաւորութիւնը, որ «առանց մեզ ոչինչ էլ չես կարող անել, միջոցներին մենք ենք տիրապետում»»:
Միքայէլ սրբազանը համոզմունք յայտնած է, որ եթէ նախկին նախագահները քաղաքական ասպարէզէն հեռանան, պայքարը անպայման կը յաջողո. «Զարմանալի է, որ մեր սիրելի Բագրատ սրբազանը դրա ընկալումը չունի»:
