Երեւանն ու Պաքուն իրար կը մեղադրեն ղեկավարներու մակարդակով հայ-ատրպէյճանական հանդիպումը տապալելու համար։
Նախ ատրպէյճանական կողմը պնդեց, թէ Հայաստանի վարչապետ Նիկոլ Փաշինեան մերժած է Մեծն Բրիտանիոյ վարչապետին մասնակցութեամբ Հայաստանի եւ Ատրպէյճանի առաջնորդներու հանդիպում կայացնելու Լոնտոնի առաջարկը։
«Հանդիպման սկիզբը պէտք է մասնակցէր Մեծն Բրիտանիոյ վարչապետը, իսկ յետոյ կը նախատեսուէր շարունակել հանդիպումը Ատրպէյճանի եւ Հայաստանի միջեւ։ Հայաստանի մերժումը կը համարենք երկխօսութենէն եւ խաղաղութեան օրակարգի յառաջմղման մտադրութենէն հեռանալու դրսեւորում»,- ըսած է Ատրպէյճանի նախագահի օգնական Հիքմեթ Հաճիեւը։
Մօտ մէկ ժամ անց Հայաստանի Արտաքին գործերու նախարարութիւնը հակադարձեց՝ խօսելով երկկողմ հանդիպման Երեւանի առաջարկին մասին:
«Հայկական կողմն առաջարկել է Հայաստանի վարչապետի եւ Ատրպէյճանի նախագահի երկկողմ հանդիպում ունենալ Եւրոպական քաղաքական համայնքի գագաթաժողովի շրջանակներում, սակայն ատրպէյճանական կողմը մերժել է առաջարկը։ Հայկական կողմի առաջարկն ուժի մէջ է: Հայկական կողմը նաեւ վերահաստատում է իր առաջարկը` աշխուժացնել բարձր եւ բարձրագոյն մակարդակով բանակցութիւնները եւ մէկ ամսուայ ընթացքում հասնել խաղաղութեան պայմանագրի ստորագրմանը»,- յայտարարած է Հայաստանի ԱԳՆ-ը։
Հայաստանի վարչապետն ու Ատրպէյճանի նախագահը կը մասնակցին Լոնտոնի մէջ մեկնարկած Եւրոպական քաղաքական համայնքի չորրորդ գագաթաժողովին։
