36 հաուպից 15 ամսուան մէջ Ֆրանսայէն պիտի հասնի Հայաստան, իշխանութիւնները հաստատած են ֆրանսական «Ֆիկարօ»-ի տեղեկութիւնները։
«Ի հարկէ, «Ֆիկարօ»-ն հիմնուած է Ֆրանսայի Հանրապետութեան Պաշտպանութեան նախարարութեան տուած տեղեկատուութեան հիման վրայ։ Ի հարկէ, մենք դա չենք հերքի»,- «Ազատութեան» հետ զրոյցին ըսաւ Ազգային Ժողովի Պաշտպանութեան յանձնաժողովի փոխնախագահ Արմէն Խաչատրեանը։
Յունիս 18-ին հաղորդուեցաւ, որ Հայաստանն ու Ֆրանսան «Սեզար» հրետանային համակարգերու ձեռքբերման պայմանագիր ստորագրած են:
«Այն համարւում է աշխարհի լաւագոյն հրետանային միջոցը, եւ Ֆրանսայի բանակում հէնց այդպիսի հրետանային միջոցներ են։ Նրանք նաեւ իրենց արդիւնաւէտութիւնն ապացուցել են տարբեր մարտական իրավիճակներում աշխարհի շատ ու շատ վայրերում։ Այդ հրետանային միջոցը Ֆրանսան շատ քիչ երկրների է վաճառել, Հայաստանի Հանրապետութիւնը, եթէ չեմ սխալւում, տասներորդ գնորդն է այդ համակարգերի։ Այն բաւականին առաջադէմ համակարգ է եւ, ի հարկէ, մեզ համար շատ կարեւոր նշանակութիւն ունի՝ պաշտպանական մեր խնդիրները լուծելու համար այդպիսի համակարգեր ունենալ»,- ըսաւ ան։
«Քաղաքացիական Պայմանագրի» պատգամաւորը շեշտեց՝ անոնք մինչեւ 50 քիլոմեթր խոցելիութեան հնարաւորութիւն ունեն, առնուազն 40-41 քմ։ Իր տեխնիկական տուեալներով «Սեզար»-ը կը բաւարարէ հայկական կողմին բոլոր պահանջները, ըսաւ ան։
«Ան շատ շարժուն է, ժամանակի միաւոր հատուածում կարողանում է կրակել որոշակի առաւելագոյն չափով արկեր, որ տարբերւում է միւս հրետանային միջոցներից, ճշգրիտ կրակոցներ իրականացնում է, այսինքն՝ գրեթէ բոլոր հրետանային համակարգերից աւելի ճշգրիտ խոցումներ է իրականացնում, իր տեխնիկական բոլոր յարաչափերով, այսօր կարելի է համարել, որ այն հանդիսանում է աշխարհի լաւագոյն հրետանային միջոցներից մէկը»։
