ԱՄՆ պետական քարտուղար Էնթընի Պլինքընը հեռախօսազրոյց ունեցած է Ատրպէյճանի նախագահ Իլհամ Ալիեւի հետ, որուն ընթացքին ընդգծած է Հայաստանի եւ Ատրպէյճանի միջեւ խաղաղութեան պայմանագրի շուտափոյթ կնքման կարեւորութիւնը։
Պլինքըն կրկին յայտնած է, որ Միացեալ Նահանգները պատրաստ է աջակցելու հետագայ փոխգործակցութեան «կողմերուն համար օգտակար որեւէ ձեւով»:
«Պետական քարտուղարը յատուկ ուշադրութիւն դարձուցած է Ատրպէյճանի կողմէ միջազգային պարտաւորութիւններու կատարման վրայ՝ մարդու իրաւունքներու պաշտպանութեան ոլորտին մէջ, եւ կոչ ըրած է շատ կարճ ժամկէտերու մէջ ազատ արձակելու բոլոր անօրինական կալանաւորուածները»,- կ’ըսուի յայտարարութեան մէջ:
Ընդգծելով երկկողմ յարաբերութիւններու կարեւորութիւնը՝ պետական քարտուղարը նշած է Ատրպէյճանի հետ կառուցողական համագործակցութիւնը կլիմայական եւ ուժանիւթային ընդհանուր խնդիրներու իրագործման հարցում։ Ան նաեւ նշած է, որ ԱՄՆ պատրաստ է կազմակերպչական աջակցութիւն ցուցաբերելու COP29 համաժողովի բարեյաջող կայացման համար։
Պլինքըն նաեւ կոչ ըրած է «թարմացնելու եւ ամրապնդելու» երկկողմ յարաբերութիւնները Միացեալ Նահանգներու եւ Ատրպէյճանի միջեւ։