Մօտ մէկ ամիս առաջ Ատրպէյճանի մէջ Պելառուսիոձ նախագահին կատարած յայտարարութենէն դժգոհ Հայաստանի վարչապետը այսօր որոշեց տեղեկացնել՝ Հայաստանէն Պելառուսիա պաշտօնական այցերը կը դադրեցուին։ Նիկոլ Փաշինեանը ներքաղաքական լարուածութեան պայմաններու մէջ կ’արձագանգէր կառավարութեան ծրագիրը տապալելու ընդդիմութեան քննադատութեան։
«Արձանագրում եմ, որ Պելառուս այլեւս երբեք ես չեմ այցելի քանի Պելառուսում նախագահ է Ալեքսանտր Լուքաշենքօն: Եւ ընդհանրապէս յայտարարում եմ, որ այս պահից Հայաստանի Հանրապետութեան ոչ մի պաշտօնական ներկայացուցիչ Պելառուս չի այցելի»,- ըսաւ վարչապետը:
Փաշինեանի այս յայտարարութեան հետեւեցաւ ԱԳՆ-ի հաղորդագրութիւնը, թէ պաշտօնական Երեւանը ետ կը կանչէ Պելառուսիոյ մէջ Հայաստանի դեսպանը՝ խորհրդակցութիւններու համար։
Մայիսի կիսուն Պաքու այցելած Ալեքսանտր Լուքաշենքօն Իլհամ Ալիեւի հետ քննարկած էր 2020-ի պատերազմը եւ այն, թէ ինչպէս իրենք ժամանակին հաւատացած են Ատրպէյճանի յաղթանակին: Նիկոլ Փաշինեան մօտ 20 օր առաջ ալ այս յայտարարութեան անդրադարձած էր կրկին խորհրդարանի ամպիոնէն: Այդ ժամանակ այցերու դադրեցման մասին ոչինչ ըսած էր, միայն պնդած էր, թէ Լուքաշենքօն վերջապէս ուղիղ ըսած է այն, ինչ ինքը 4 տարիէ կը փորձէ բացատրել մարդոց, որ 44-օրեայ պատերազմի նախապատրաստման մասնակցած են ՀԱՊԿ անդամ առնուազն երկու պետութիւն, որոնցմէ մէկը, ըստ Փաշինեանի, Պելառուսիան է:
«Դրանից յետոյ ես պէտք է գնամ Պելառուսի նախագահի հետ ՀԱՊԿ ձեւաչափում նստեմ հարց քննարկե՞մ, բա դուք չէ՞ք որ խօսում էք արժանապատուութիւնից, սկզբունքայնութիւնից եւ այդպէս շարունակ, չնայած նաեւ իրավիճակ կայ, որ ԵԱՏՄ-ում ու ԱՊՀ-ում ինչ-որ առումով ստիպուած եմ լինելու», – նշած է վարչապետը:
Պելառուսիոյ Արտաքին գործերու նախարարութեան խօսնակ Անաթոլի Կլազը յայտարարեց, որ ԱԳՆ կանչուած է Մինսքի մէջ ՀՀ դեսպանատան աշխատակիցը՝ պարզաբանումներ ներկայացնելու վարչապետ Նիկոլ Փաշինեանի յայտարարութիւններուն վերաբերեալ:
«Այսօր ԱԳՆ կանչուած է Հայաստանի դեսպանատան ներկայացուցիչը, որպէսզի փորձէ մեզ բացատրել այս հարցը։ Հաշուի առնելով իրավիճակի զարգացումը, յառաջիկային Երեւանէն Մինսկ կը ժամանէ նաեւ մեր դեսպանը»,- ըսած է Կլազը:
